“Bakı” ilə gedən Fariz Yusifov “Bakı” ilə də qayıtdı

Futbol üzrə Unibank Premyer Liqasının VIII turunun oyunlarına təyinat alan hakimlərin adları açıqlanıb. Lent.az-ın Peşəkar Futbol Liqasının rəsmi saytına istinadən verdiyi məlumata görə, “Xəzər Lənkəran” və “Bakı” klubları arasında keçiriləcək turun mərkəzi matçına FİFA referisi Fariz Yusifov təyinat alıb.

Yusifov sonuncu dəfə yüksək liqada V turun “Bakı” – “Gəncə” matçını idarə edib. 1:1 hesabı ilə nəticələnən həmin görüşdə o, meydan sahiblərinin 2 futbolçusunu meydançadan qovsa da, qonaqların oyunçusu Romal Hüseynovu bağışlayıb. Bu səbəbdən, ona növbəti 2 həftə ərzində yalnız 1 dəfə I divizionun oyunu həvalə olunub.

VI turda “Muğan” - “Xəzər Lənkəran” görüşündəki idarəçiliyi narazılıqlar doğuran digər FİFA referisi Anar Salmanova ardıcıl 2 turdur təyinat verilmir. Elə ötən tur Lənkəran komandasının “Neftçi” ilə matçını idarə edən daha bir beynəlxalq dərəcəli futbol hakimi Vüsal Əliyev də məcburi istirahətə göndərilib. Futzal üzrə FİFA referisi Elçin Məmmədov isə I divizionda “Şahdağ” – “Neftçi İSM” matçının baş hakimi olacaq. Məmmədov ötən tur Premyer Liqada “Muğan” – “Simurq” oyununu idarə edib.

1 oktyabr (cümə)

18:00. “Neftçi” (Bakı) – AZAL (Bakı)
Hakimlər: Əfqan Həmzəyev, Munis Abdullayev, Eldar Nağıbəyov, Tahir Əhmədov
Tofiq Bəhramov adına Respublika stadionu.

18:00. “İnter” (Bakı) – “Muğan” (Salyan)
Hakimlər: Elnur Muradov, Roman Vasilyev, Elşən Acalov, Orxan Məmmədov
”Şəfa” stadionu.

16:00. “Simurq” (Zaqatala) – “Qəbələ”
Hakimlər: Ceyhun Haşımov, Coşqun Həsənov, Azad Ə. Hüseynov, Hacıəli Ağayev
Zaqatala şəhər stadionu.

2 oktyabr (şənbə)

16:00. “Turan” (Tovuz) – “Qarabağ” (Ağdam)
Hakimlər: Ramil Diniyev, Samir Hacıyev, Ramiz Əsədov, Əmrah İbrahimov
Tovuz şəhər stadionu.

16:00. MOİK (Bakı) – “Gəncə”
Hakimlər: Elvin Əsgərov, Azər Əsgərov, İsgəndər Əliyev, Zahid Həşimov
Tofiq İsmayılov adına Suraxanı qəsəbə stadionu.

18:00. “Xəzər Lənkəran” – “Bakı”
Hakimlər: Fariz Yusifov, Elman Musayev, Vaqif Musayev, Fuad Həsənov
Lənkəran şəhər mərkəzi stadionu.