Sabah yol polisi gücləndirilmiş iş rejimində işləyəcək

Sabah Bakıda yol polisi gücləndirilmiş iş rejimində fəaliyyət göstərəcək.

Bu barədə APA-ya Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov məlumat verib. V. Əsədov qeyd edib ki, sabah paytaxt məktəblərində keçiriləcək “Son zəng” tədbirlərində yol hərəkətinin təhlükəsiz və nəqliyyat vasitələrinin sərbəst hərəkətini təmin etmək üçün Bakı Şəhər Dövlət Yol Polisi gücləndirilmiş iş rejimində işləyəcək.

V. Əsədov, həmçinin bildirib ki, bütün məktəblərin yerləşdiyi küçələrdə, onlara bitişik yollarda yol polisi nəqliyyat vasitəsini idarə edən şəxslərin sənədlərini yoxlayacaq.

Onun sözlərinə görə, ötən il keçirilən “Son zəng” tədbirində 40 avtomobili sürücülük vəsiqəsi olmadan idarə edən şəxslər barəsində inzibati tədbir görülüb.

Şöbə rəisi nəqliyyat vasitələrinin sürücülərinə müraciətində bildirib ki, tədbir keçirilən məktəblərin yanında sıxlığın və tıxacın yaranmaması üçün şəxsi avtomobillərdən az istifadə etmələri xahiş edilir.