Körpüdə qəza: 1 ölü, iki yaralı

Lənkəran-Boradigah yolunda ölümlə nəticələnən yol-nəqliyyat hadisəsi baş verib. Hadisə Lənkəranın Veravul kəndindən keçən çayın üzərindəki körpüdə olub.

Belə ki, Masallı rayonunun Təzə Alvadı kənd sakini, 1959-cu il təvəllüdlü Mirzəhəsən Abbas oğlu Cahangirovun idarə etdiyi “Mercedes” markalı, 10 NF 314 dövlət nömrə nişanlı mikroavtobus Masallının Ərkivan qəsəbə sakini, 1990-cı il təvəllüdlü Orucəli Çingiz oğlu Şirəliyevin idarə etdiyi 62 BC 708 dövlət nömrə nişanlı “VAZ-2101” markalı avtomobil ilə toqquşub. Güclü zərbənin təsirindən hər iki avtomobil ciddi deformasiyaya uğramaqla bərabər “VAZ-2101”in sürücüsü hadisə yerində dünyası dəyişib. Onun yanındakı sərnişin isə müxtəlif dərəcəli bədən xəsarətləri ilə Lənkəran Regional Müalicə Diaqnostika Mərkəzinə yerləşdirilib. “Mercedes”in sürücüsü isə yüngül xəsarət alıb.

Faktla bağlı Lənkəran şəhər polis şöbəsində araşdırmalara başlanıb.

anspress