<b>Şəhid qızını avtomobillə vuraraq öldürən gəncin işinə yenidən baxılacaq</b>
02 aprel 2018 17:32 (UTC +04:00)

Şəhid qızını avtomobillə vuraraq öldürən gəncin işinə yenidən baxılacaq

Bakı Ağır Cinayətlər Məhkəməsində Bakıda ölümlə nəticələnən yol-nəqliyyat hadisəsini törətməkdə təqsirləndirilən Rəhim Rəhimovun cinayət işi üzrə məhkəmə iclası davam etdirilib.
 
Lent.az-ın məlumatına görə, hakim Novruz Kərimovun sədrliyi ilə keçirilən prosesdə təqsirləndirilən R.Rəhimovun vəkili Muxtar Mustafayev çıxış edib.
 
O bildirib ki, müdafiə etdiyi şəxsin psixoloji problemləri olub. Müdafiəçi qeyd edib ki, hadisə zamanı R.Rəhimov sarsıntı keçirərək, yol kənarında oturaraq ağlayıb.
 
Daha sonra vəkil vəsatət qaldırıb. O, müvəkkili ilə bağlı ekspertizanın təyin edilməsini istəyib: "Müdafiə etdiyim şəxs hadisədən sonra həmin vəziyyətdə ifadə verib".
 
Məhkəmə vəsatəti təmin etməyib.
 
Prosesin davamında R.Rəhimovun müdafiəsinə daha bir vəkilin Novruz Əliyevin qoşulmaq istədiyi məlum olub. Vəkil məhkəmədən bir neçə gün vaxt istəyərək sadəcə protokola və sənədlərlə tanış olmaq istədiyini deyib.
 
Vəkil məhkəməni uzatmaq niyyətində olmadıqlarını və işin təzələnməsini istəmədiklərini deyib.
 
Hakim bildirib ki, əgər yeni vəkil işə qəbul edilərsə, iş yenilənməlidir. Bu isə prosesin uzanmasına səbəb olacaq.
 
R.Rəhimovun digər iki vəkili də yeni müdafiəçinin işə qoşulmasını istəyiblər. Məhkəmə vəsatəti təmin edilib. İş yenidən baxılacaq.
 
Proses aprelin 5-də davam etdiriləcək.
 
Xatırladaq ki, dövlət ittihamçısı çıxışında R.Rəhimovun 6 il müddətinə azadlıqdan məhrum edilməsini istəmişdi.
 
Qeyd edək ki, Bakı şəhər prokurorluğunun və şəhər Baş Polis İdarəsinin ötən il noyabrın 8-də Səbail rayonunda baş vermiş qəza ilə bağlı yaydığı məlumata əsasən, Səbail rayonunun polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində rayon ərazisində yol nəqliyyat hadisəsi törədərək hadisə yerindən qaçmış sürücü tutularaq istintaqa cəlb edilib.
 
Belə ki, ötən ilin noyabrın 8-də paytaxtın Səbail rayonu ərazisində naməlum sürücünün idarə etdiyi “Jeep Grand Cherokee” markalı 90-FO-007 dövlət nömrə nişanlı avtomobillə yolu keçmək istəyən 1975-ci il təvəllüdlü Əkbərova Könül Elton qızını vurması, sonuncunun aldığı xəsarətlərdən hadisə yerində vəfat etməsi və sürücünün hadisə yerindən qaçması faktına görə rayon Polis İdarəsinin İstintaq şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb. Aparılmış təxirəsalınmaz istintaq-əməliyyat tədbirləri nəticəsində hadisə vaxtı qeyd edilən avtomobilin sürücülük hüququ olmayan, yetkinlik yaşına çatmayan - 2000-ci il təvəllüdlü Rəhim Rəhimov tərəfindən idarə edilməsi müəyyən edildiyindən cinayət işi Cinayət Məcəlləsinin 263-1.3 (nəqliyyat vasitələrini idarə etmək hüququ olmayan şəxs tərəfindən yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələrinə tövsif edilib, R.Rəhimov noyabrın 29-da şübhəli şəxs qismində tutularaq müdafiəçi ilə təmin edilməklə dindirilib. O, iş üzrə təqsirləndirilən şəxs qismində cəlb olunaraq ona Cinayət Məcəlləsinin qeyd edilən maddələri ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.
 
Xatırladaq ki, qəzanı törədən 17 yaşlı R.Rəhimov iş adamı, “Xırdalan Xəz” ASC-nin rəhbəri Akif Rəhimovun oğludur. A.Rəhimov isə “Yeganə” şadlıq sarayının rəhbəri Məmməd Rəhimovun qardaşıdır.
 
Qəzada ölən K.Ələkbərova isə şəhid Elton Ələkbərovun qızıdır.
1 2 3 4 5 İDMAN XƏBƏRLƏRİ
# 232
avatar

Səlcuq Elçin

Oxşar yazılar