Qatildən DÜNYA REKORDU: 45 il təkadamlıq kamerada oturdu

Böyük Britaniyadan olan seriyalı qatil 16,4 min gün (demək olar ki, 45 il) beton plitədən olan çarpayıda təkadamlıq kamerada yatıb və dünya rekordu müəyyənləşdirib.

Lent.az bildirir ki, bu barədə “Daily Mirror” məlumat yayıb.

69 yaşlı Robert Modsli ilk qətlini 1974-cü ildə törədib. Tezliklə ömürlük həbs cəzası alıb və həbsxanaya gedib. 1978-ci il iyulun 28-də iki məhbusu öldürüb və bundan sonra təcrid olunub.

Məhkumlar və həbsxana işçiləri Modsli ilə görüşməkdən və onunla ünsiyyətdən imtina etdikləri üçün 1983-cü ildə onun üçün beş-dörd metr ölçüsündə xüsusi kamera tikilib.

Bu otaqda Modsli demək olar ki, 45 ilini tək keçirib. Bir dəfə tutuquşu istəyib, amma rədd edilib. 2000-ci ildə cinayətkar "ölməyə icazə" üçün də müraciət etsə də, müsbət cavab almayıb. Modslinin keçmiş kamera yoldaşı təkadamlıq kameranı işgəncə adlandırıb və həbsxana işçilərini insanlara qarşı qeyri-insani rəftarına görə qınayıb.