Həbsdəki general ittihamla razılaşdı

Müdafiə Nazirliyinin mənimsəmədə ittiham olunan Maliyyə və büdcə idarəsinin keçmiş rəisi, general-mayor Nizami Məmmədov, Hərbi Hava Qüvvələrinin (HHQ) Maliyyə xidmətinin keçmiş rəisi, polkovnik Cəlal Kazımov, Quru Qoşunların Maliyyə idarəsinin rəisi Bayram Bayramov və həmin idarənin zabiti Vüsal Əlizadənin Dövlət Təhlükəsizliyi Xidmətində başlanılmış cinayət işi üzrə məhkəmə prosesi davam etdirilib.

Lent.az xəbər verir ki, Bakı Hərbi Məhkəməsində keçirilən prosesdə təqsirləndirilən şəxslərin anket məlumatları yenidən dəqiqləşdirilib.

Sonra təqsirləndirilən Cəlal Kazımovun müvəkkili vəsatətlə çıxış edərək bildirib ki, müdafiə etdiyi şəxsə Heydər Əliyev adına Ali Hərbi Məktəblə bağlı verilən 423 min manatlıq ittiham qəbul etmirlər və həmin epizod ittihamdan çıxarılmalıdır:

"Ali Məktəbin mühasibatlıq sənədləri müvafiq əmrlə 2015-2020-ci illər ərzindəki hissələri yandırılaraq məhv edilib. Lakin həmin dövrlə bağlı Cəlal Kazımova 423 min manat ittiham verilib. İş üzrə aparılmış mühasibatlıq ekspertiza görə bu məbləğ Maliyyə Nazirliyindən alınan arayışlar və bankların hesablarından çıxarılıb. Ekspert bu məbləğin mənimsənilə biləcəyini bildirib. Yəni burda konkret deyilmir, mənimsənilib, o burda edilə biləcəyini ehtimal edir. Ehtimala görə, müvəkkilimə rəsmi ittiham verilib"

Hakimlər vəsatəti baxılmamış saxlayıb. Bildirib ki, bu məsələlərə məhkəmə istintaqında və bu sənədlərin tədqiqi mərhələsində baxılacaq.

Sonra prokuror Fuad Musayev ittiham aktının nəticəvi hissəsini elan edib.

İttihama görə, təqsirləndirilən şəxslər 2017-2022-ci illər ərzində vəzifə saxtakarlığı edərək Müdafiə Nazirliyinin aid satılanalmaları və maliyyə xərclərin süni artırmaqla, müxtəlif şəxslərin insanların adına açılan saxta maaş kartları ilə onlara etibar edilən ümumilikdə 143 milyon manatı bir qrup şəxs halında nağdlaşdıraraq mənimsəyərək talayıblar.

Onlara bu əməllərinə görə Cinayət Məcəlləsinin 179.4-cü (xüsusilə külli miqdarda mənimsəmə), 313-cü ( vəzifə saxtakarlığı) maddələri ittiham verilib.

Hakim elan edib ki, verilən ittiham təsdiqini taparsa, təqsirləndirilən şəxslər 10-14 ilə qədər azadlıqdan məhrum edilə bilər.

İttihama münasibət bildirən təqsirləndirilən şəxslər özlərini qismən təqsirli bilib.

General-mayor Nizami Məmmədov bildirib ki, özünün işi ilə bağlı verilən ittihamla razılaşır, lakin nazirliyin Satınalma və təchizat idarəsi, Mənzil-istismar idarəsi ilə bağlı verilən ittihamları qəbul etmir.

O, mənimsənilən 12 milyon manatın rəhbərlik etdiyi Maliyyə İdarəsi ilə bağlı hissəsi ilə razılaşıb və dəymiş ziyanı ödəyib.

Ona verilən digər epizodlarla bağlı 6 milyon manat isə Satılma və təchizat idarəsi və Mənzil-istismar idarəsi ilə bağlıdır. Keçmiş idarə rəisi bu hissə ilə razılaşmayıb və bu epizod üzrə verilən ittihamı qəbul etməyib.

Təqsirləndirilən şəxslərdən Vüsal Əlizadənin vəkili prosesin qapalı keçirilməsi ilə bağlı vəsatət verib.

Hakimlər bəzi ifadələrdə dövlət sirrini təşkil edən məsələlər ola biləcəyi səbəbindən təqsirləndirilən şəxslərin ifadə verməsi hissənin qapalı keçirilməsi ilə bağlı qərar qəbul edib.

Proses sentyabrın 29-da davam edəcək.

Qeyd edək ki, Dövlət Təhlükəsizliyi Xidmətində başlamış silsilə araşdırmalar üzrə Müdafiə Nazirliyinin maliyyə strukturlarında mənimsəmə faktları müəyyən edilib, yüksək vəzifəli maliyyə xidmət rəisləri ilə yanaşı, Müdafiə Nazirliyinin Maliyyə İdarəsinin rəisi general-mayor Nizami Məmmədov da xüsusilə külli miqdarda mənimsəmə cinayətlərində ittiham edilərək həbs edilib.

Zərərçəkmiş qismində Maliyyə Nazirliyi tanınıb. Cinayət işi üzrə dövlətə dəymiş ziyan 143 milyon manata yaxındır. İbtidai istintaq zamanı iş üzrə dəymiş zərərin 40 milyon manatı ödənilib.

General Nizami Məmmədov 18 milyon manat mənimsəmədə təqsirləndirilir. İstintaq dövründə 12 milyon manatlıq zərəri ödəyib.