Bakının mərkəzində 50 minlik saxta içki aşkarlandı - VİDEO

Külli miqdarda spirtli içkinin realizə edilməsinin qarşısı alınıb.

Dövlət Gömrük Komitəsindən Lent.az-a verilən məlumata görə, üzərlərində Azərbaycanın müvafiq aksiz markası olmayan müxtəlif markalı spirtli içkilərin Bakı şəhəri, Səbail rayonu, Badamdar qəsəbəsində yerləşən yaşayış sahələrində saxlanılması, habelə həmin spirtli içkilərin bir hissəsinin "Daewoo Damas" markalı minik avtomobilində satış məqsədilə realizə edilməsi barədə əməliyyat məlumatı daxil olub. Gömrük əməkdaşlarının ərazidə keçirdiyi əməliyyat tədbiri zamanı "Daewoo Damas" markalı minik avtomobilinə baxış keçirilib və avtomobilin salon və arxa yük yerində saxlanılan müxtəlif ölçülü karton qutulardan və selofan torbalardan 82 ədəd müxtəlif markalı spirtli içkilər aşkarlanıb.

Bundan sonra əməliyyat tədbirlərinin davamı olaraq Badamdar qəsəbəsindəki evin həyətyanı sahəsində yerləşən 2 ədəd qapalı tipli yaşayış sahəsinə keçirilən baxış zamanı 1443 ədəd spirtli içkilər və 100 qutu "Davidoff gold slims" markalı siqaretlər aşkar edilib.

Qeyd edək ki, aşkarlanan spirtli içkilərin və siqaretlərin ümumi dəyəri 48502 (qırx səkkiz min beş yüz iki) manat təşkil edir.