Bakıda AİLƏ FACİƏSİ: Arvadını öldürüb, intihara cəhd etdi - YENİLƏNİB

Bakıda baş verən qətllə bağlı prokurorluq məlumat yayıb.

Xəzər rayon Prokurorluğundan Lent.az-a verilən xəbərə görə, iyulun 8-i saat 17 radələrində Xəzər rayonu, Binə qəsəbəsi ərazisində 35 yaşlı Elnarə Musayevanın qəsdən öldürülməsi barədə rayon prokurorluğuna məlumat daxil olub.

Aparılmış ilkin araşdırmalarla müəyyən edilib ki, zərərçəkmişin əri 41 yaşlı Yadigar Cəfərov ailə-məişət münaqişəsi zəminində aralarında yaranmış mübahisə zamanı Elnarə Musayevaya bıçaqla xəsarətlər yetirərək qəsdən öldürüb, daha sonra həmin bıçaqla özünə xəsarət yetirib.

Yadigar Cəfərov 3 saylı Klinik Şəhər Xəstəxanasına yerləşdirilib.

Faktla bağlı Xəzər rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Hazırda cinayət işi üzrə istintaq davam etdirilir.

***

00:57

Bakıda əri tərəfindən bıçaqlanaraq qətlə yetirilən qadının ad-soyadı məlum olub.

Lent.az APA-ya istinadla xəbər verir ki, bu, 35 yaşlı Musayeva Elnarə Əlimusa qızıdır.

O, əri - 41 yaşlı Cəfərov Yadigar Hüseynalı oğlunun vurduğu 22 bıçaq zərbəsi nəticəsində həyatını itirib. Məlumata görə, hadisəyə səbəb qısqanclıq olub.

Qeyd edək ki, onların birgə nikahdan iki övladı var.

***

Saat 00:47

Bakının Xəzər rayonunda qətl hadisəsi baş verib.

APA xəbər verir ki, hadisə Binə qəsəbəsi, Südçülük sovxozu ərazisində qeydə alınıb.

1980-ci il təvəllüdlü Cəfərov Yadigar Hüseynalı oğlu həyat yoldaşına bir neçə bıçaq zərbəsi vuraraq onu qətlə yetirib. Daha sonra Y.Cəfərov özünü bıçaqlayıb. Hadisə nəticəsində hələlik ad-soyadı bilinməyən qadın çoxsaylı bıçaq xəsarətlərindən hadisə yerində keçinib. Y.Cəfərov isə ağır vəziyyətdə xəstəxananın reanimasiya şöbəsinə yerləşdirilib.

Faktla bağlı istintaq araşdırmaları aparılır.