Tbilisdən qatarla texniki avadanlıqlar gətirmək istədilər

"Tbilisi-Bakı" sərnişin qatarı ilə Gürcüstandan gələn 3 Azərbaycan vətəndaşının əl yükünə baxış keçirilib.

Dövlət Gömrük Komitəsindən Lent.az-a verilən məlumata görə, bu zaman sərnişinlərdən ikisinin üst geyimlərinin ciblərində 9 ədəd "İphone 11 Pro" və 5 ədəd "Samsung Galaxy Fold" markalı mobil telefon olduğu müəyyən edilib. Bundan əlavə, gömrük nəzarətinə təqdim edilən, üzərində "Play Station 4" və "Eurolux" yazılan qutuların içərisindən isə 3 ədəd "İphone watch" markalı saat, 6 ədəd "İphone Airpods" markalı qulaqlıq, eləcə də içərisində qulaqlıq və yükləyicilər olan 4 ədəd "Samsung Galaxy Z Flip" markalı mobil telefonlara məxsus qutu aşkarlanıb.

Əməliyyat məlumatının davamı olaraq həmin qatarın digər kupesində olan sərnişinin üst geyiminin ciblərindən isə 4 ədəd "Samsung Galaxy Z Flip" markalı mobil telefon, içərisində 1 ədəd qulaqlıq, 1 ədəd yükləyici olan 27 ədəd "İphone", içərisində 1 ədəd yükləyici, 1 cüt bluetooth qulaqlıq olan 5 ədəd "Samsung Galaxy Fold" markalı mobil telefonlara məxsus qutular aşkarlanıb.

Faktla bağlı araşdırma aparılır.