Murtuz Ələsgərovun cənazəsi Təzə Pir məscidinə aparılıb

Ailə üzvlərinin Lent.az-a verdiyi məlumata görə, burada dini qaydada mərasim keçiriləcək.

Ailə üzvlərinin bildirdiyinə görə, eks-spikerlə rəsmi vida mərasiminin harada keçiriləcəyi və Murtuz Ələsgərovun harada dəfn olunacağı hələlik dəqiqləşməyib: “Hələ dəqiq bilinmir. Vida mərasimi böyük ehtimalla sabah təşkil olunacaq”.

Qeyd edək ki, Milli Məclisin keçmiş spikeri Murtuz Ələsgərov 84 yaşında vəfat edib. Lent.az-ın məlumatına görə, M.Ələsgərov uzun sürən xəstəlikdən sonra bu gün Bakı şəhərində dünyasını dəyişib.

Murtuz Ələsgərov 1928-ci il sentyabrın 20-də Gəncə şəhərində anadan olub. Azərbaycan Dövlət Universitetinin hüquq fakültəsini bitirib. 1954-cü ildən Azərbaycan Dövlət Universitetinin dövlət hüququ kafedrasının baş müəllimi, dosenti, 1957-ci ildən beynəlxalq hüquq kafedrasının müdiri vəzifələrində çalışıb. 1993–1996-cı illərdə Bakı Dövlət Universitetinin rektoru olub. 1965-ci ildən universitetin konstitusiya hüququ kafedrasının müdiri işləyib. Azərbaycan Dövlət Universitetinin hüquq fakültəsini bitirib. Hüquq elmləri doktoru, professor, respublikanın əməkdar hüquqşünasıdır. "İstiqlal" ordeni, "Azərbaycan Respublikası Prezidentinin fəxri diplomu" ilə təltif edilib. MDB-nin "Sodrujestvo" ordeninə və Rusiya Federasiyasının "Dostluq" ordeninə layiq görülüb.

Murtuz Ələsgərov birinci və ikinci çağırış Azərbaycan Respublikası Milli Məclisinin deputatı olub, 1996-cı il oktyabrın 16-dan 2005-ci il dekabrın 2-dək parlamentin sədri vəzifəsində çalışıb. Murtuz Ələsgərov 2005-ci il noyabrın 6-dan 11 saylı Qaradağ seçki dairəsindən deputat seçilib. Milli Məclisin Hüquq siyasəti və dövlət quruculuğu məsələləri daimi komissiyasının, Azərbaycan-Fransa, Azərbaycan-Səudiyyə Ərəbistanı, Azərbaycan-Türkiyə parlamentlərarası əlaqələr üzrə işçi qruplarının üzvü olub. Yeni Azərbaycan Partiyası 2010-cu ildə keçirilən parlament seçkilərində yaşını nəzərə alaraq M.Ələsgərovun adını namizədlər siyahısına daxil etməyib.

Allah rəhmət eləsin!

Nizam RZA