Yanğını söndürməyə vertolyot qaldırıldı - VİDEO

Bu gün Heydər Əliyev Mərkəzində yanğın başlayıb. Bu barədə APA-ya Fövqəladə Hallar Nazirliyin Dövlət Yanğından Mühafizə Xidmətindən bildirilib.

İlkin məlumata görə, yanğın saat 11:30 radələrində mərkəzin qüllələrindən birində başlayıb və ətrafa yayılıb. Külək yanğının böyük əraziyə yayılmasına səbəb olub. Hazırda həmin qüllədə alovun ram edilməsinə çalışılır.

Lent.az-ın hadisə yerində olan müxbirinin verdiyi məlumata görə, mərkəzdən qalxan qatı tüstü Heydər Əliyev prospekti boyunca və Cavanşir körpüsünədək yayılıb. Ətrafı duman kimi bürüyən tüstü səbəbindən görünüş məhdudlaşıb və nəfəs almaq çətinləşib. Ərazidə böyük avtomobil tıxacı yaranıb. Hazırda olay yerinə 50-dək yanğınsöndürən maşın cəlb olunub. Yanğının xüsusi vertolyotlar vasitəsilə söndürülməsinə cəhd edilir.

Bakı şəhər Təcili və Təxirəsalınmaz Tibbi Yardım Stansiyasının operativ və hospital işlərinin təşkili şöbəsinin böyük həkimi Zemfira Vahidovanın APA-ya verdiyi məlumata görə, hadisı yerinə 5 təcili tibbi yardım briqadası göndərilib. Hələlik yanğınla əlaqədar hər hansı şəxsin xəsarət almasına dair müraciət daxil olmayıb. Stansiyadan bildiriblər ki, tüstüdən boğulma hadisələrinin baş vermə ehtimalı olduğundan briqadalar hadisə yerində fəaliyyətini davam etdirilir.

Baş nazirin müavini Abid Şərifov, fövqəladə hallar naziri Kəmaləddin Heydərov, milli təhlükəsizlik naziri Eldar Mahmudov, səhiyyə naziri Oqtay Şirəliyev, nəqliyyat naziri Ziya Məmmədov, Bakı şəhər icra hakimiyyətinin başçısı Hacıbala Abutalıbov, Bakı şəhər prokuroru Əziz Seyidov hadisə yerindədir.