Mehmet Ağara 5 illik həbs cəzası

Lent.az-ın “Hürriyət” qəzetinə istinadən verdiyi məlumata görə, Mehmet Ağar Türkiyə Baş Polis İdarəsinin rəisi vəzifəsində olduğu dönəmdə silahlı qrup yaratmaqda ittiham olunub. Ankara XI Ağır Cəza Məhkəməsi bu işə “Susurluq olayı” çərçivəsində baxıb. Mehmet Ağar 1994-cü ildə qaçırılaraq öldürülən vəkil Faik Candarla bağlı ölümdə də günahlandırılır. Çağdaş Hüquqçular Dərnəyi Faik Candarın ailəsinin vəkilləri qismində prosesə qatılmaq istəsələr də, məhkəmə bunu qəbul etməyib. Vəkil Səlçuq Kozağaçlı isə “Susurluk olayı” ilə bağlı həbs olunan Ayhan Çarkın Mehmet Ağar’ın və İbrahim Şahinin adını çəkdiyini bildirib. O deyib ki, Ali Məhkəməyə hücum, Şəmdinli olayı “Susurluq olayı”nın davamıdır.

Məhkəmə sonda Mehmet Ağarın 5 il azadlıqdan məhrum edilməsi barədə qərar çıxarıb. Mehmet Ağar isə “CNN Türk” telekanalına açıqlamasında deyib ki, apelyasiya məhkəməsinə müraciət olunacaq, bununla bağlı vəkillər açıqlama verəcəklər.