BQXK erməni kəşfiyyatçı ilə bağlı Azərbaycanın rəsmi qurumlarına müraciət edib

Bu barədə APA-ya BQXK-nın Bakı ofisinin yayım şöbəsinin rəhbəri İlahə Hüseynova məlumat verib. Onun sözlərinə görə, saxlanılan erməni əsirin ailəsi qurumun Ermənistan nümayəndəliyinə müraciət edərək, onun taleyinə aydınlıq gətirilməsini xahiş edib. Həmin müraciət əsasında BQXK Azərbaycanın aidiyyəti qurumlarına sorğu göndərib. Sorğuya cavab verən Azərbaycanın rəsmi qurumları Ermənistan vətəndaşının Azərbaycan Silahlı Qüvvələri tərəfindən saxlanması faktını təsdiqləyib.

Qeyd edək ki, sentyabrın 11-də saat 17.00-da cəbhənin şimal-qərb istiqamətində bir neçə nəfərdən ibarət erməni təxribat qrupunun növbəti hiyləsi dəf edilib. Təxribatçılar əməliyyatlarının baş tutmadığını görüb qaçmağa başlasalar da, onlardan biri ələ keçib. Kəşfiyyatçıya aid olan bir sıra ləvazimatlarla birlikdə Manvel Mamikonoviç Sarıbekyan saxlanılıb.

Onunla aparılan ilkin söhbət nəticəsində aydınlaşıb ki, Manvel Sarıbekyanın Azərbaycanın nəzarət etdiyi ərazilərə soxulmaq istəyi Ermənistan xüsusi xidmət orqanlarının təxribat törətmək tapşırığı əsasında olub. Hazırda təxribatın detalları üzərində araşdırma aparılır.

Ermənistan Müdafiə Nazirliyi isə Manvel Sarıbekyan adlı hərbçinin əsir düşməsi barədə məlumatları təkzib edib.