AKU-nun rektoru: “Rövşən Məmmədovu mən tutmamışam”

Azərbaycan Kooperasiya Universitetinin (AKU) rektoru Eldar Zülfüqarov köməkçisi Rövşən Məmmədov barədə məlumatlı deyil. Eldar Zülfüqarov bunu Lent.az-ın müxbiri ilə söhbətində bildirib.

Rektor söyləyib ki, Rövşən Məmmədov universitetə gəlməyib və onunla əlaqə saxlamayıb: “Rövşənin tutulduğu barədə mən də müxtəlif yerlərdən eşitmişəm, amma dəqiq nələr olub-bitdiyini bilmirəm”.

Müxbirin suallarını cavablamadan boyun qaçıran Eldar Zülfüqarov “onu mən tutmamışam ki, məndən müsahibə alırsınız, gedin kim tutub ondan soruşun” - deyərək, ətraflı danışmayıb.

AKU-nun Humanitar Məsələlər üzrə prorektoru və mətbuat katibi İlham Vəliyev isə Rövşən Məmmədovun tutulması barədə ilk dəfə dünən (14 sentyabrda) Lent.az-dan oxuduğunu söyləyib. İlham Vəliyev R.Məmmədovun özü ilə əlaqə saxlamadıqlarını və onlarda bu barədə heç bir məlumat olmadığını söyləyib.

Lent.az-ın sentyabrın 14-də verdiyi xəbərdə AKU-nun rektor köməkçisi Rövşən Məmmədovun rüşvətə görə istintaqa cəlb olunduğu yazılmışdı. Lent.az-a daxil olan digər məlumatda isə Rövşən Məmmədovun tutulduğu bildirilib.

Vüqar Baba