İldırımın törətdiyi yanğın söndürüldü

Bu gecə saat 02.00 radələrində “Azerenerji”-yə məxsus Siyəzən Yarımstansiyasında elektrik transformatoru partlayıb. Yarımstansiyaya ildırım düşüb. Partlayışdan sonra transformatordan ətrafa yayılmış yağ alışıb. Baş verən yanğının qarşısını almaq üçün əraziyə Xızı, Şabran, Siyəzən, Sumqayıt YMH-nin maşınları cəlb olunub və yanğının qarşısını səhərə yaxın almaq mümkün olub.

Yarımstansiyadan Lent.az-a verilən məlumata görə, hazırda bütün rayon rəhbərliyi hadisə yerindədir və yanğının törətdiyi fəsadlar aradan qaldırılır.

Qeyd edək ki, baş vermiş partlayış nəticəsində Siyəzən rayonuna və rayon ərazisində fəaliyyət göstərən neft mədənlərinə elektrik enerjisinin verilməsi dayandırılıb.

***

Saat 10:01

Sentyabrın 24-nə keçən gecə Siyəzəndə elektrik transformatorunu ildırım vurub. Lent.az-ın rayon sakinlərinə istinadən məlumatına görə, Beşbarmaq dağı yaxınlığındakı transformator ildırım vurması nəticəsində partlayıb və ətrafa böyük həcmdə yağ yayılıb. Partlayışdan sonra transformator və ətrafa axan yağ alovlanıb.

Sakinlərin bildirdiyinə görə, hadisə yerinə gəlmiş yanğınsöndürənlər saat 03 radələrindən başlayan yanğını səhər saatlarında söndürməyə müvəffəq olublar.

Hazırda rayon ərazisində elektrik təminatı dayandırılıb.