Sumqayıtda növbəti partlayış səsi - HADİSƏ YERİNDƏN - YENİLƏNİB

Sumqayıtda Səthi Yuyucu Vasitələr Zavodu MMC-nin ərazisində növbəti partlayış səsi eşidilib. Lent.az-ın hadisə yerində olan əməkdaşı bildirir ki, daha bir partlayış səsi eşidilib və alov güclənib. Yanğınsöndürənlər alovun qarşısını almaq üçün zəruri tədbirlər görürlər.

***

Sumqayıtda Səthi Yuyucu Vasitələr Zavodu MMC-də partlayışdan sonra başlayan yanğın qismən lokallaşdırılıb. Lent.az-ın hadisə yerində olan əməkdaşının verdiyi məlumata görə, yanğınsöndürənlər hazırda mazut gölməçələrindəki yanğını söndürürlər. Görülən tədbirlər nəticəsində yanğının digər çənlərə keçməsinin qarşısı alınıb.

***

17 Sentyabr 2012 20:24

Sumqayıtda “Səthi Yuyucu Vasitələri Zavodu” MMC-də növbəti partlayış baş verib.

Lent.az-ın hadisə yerində olan əməkdaşının verdiyi məlumata görə, zavodda bir neçə dəqiqə öncə növbəti partlayış olub. Nəticədə yanğının miqyası yenidən güclənib. Ərazi qatı tüstüyə bürünüb.

Zavodun 500 metrliyində yerləşən iki mərtəbəli evlərdə yaşayan sakinlər təlaş içərisində küçələrə axışıb.

Zavodun yerləşdiyi əraziyə heç kim yaxın buraxılmır.

***

Sumqayıtda yanğın “Səthi Yuyucu Vasitələri Zavodu” MMC-də baş verib.

APA-nın hadisə yerində olan əməkdaşının verdiyi məlumata görə, zavodda bir neçə dəqiqə əvvəl növbəti partlayış olub. Partlayışdan sonra ərazidə yanğın yenidən güclənib.

“Hadisənin baş verdiyi zavod özəl müəssisədir. Hələlik konkret nəsə demək mümkün deyil. İndi yanğının söndürülməsi ilə bağlı tədbirlər görülür. Lazım olan məlumat FHN tərəfindən açıqlanacaq”. Bunu isə APA-ya açıqlamasında Sumqayıt Şəhər İcra Hakimiyyətinin başçısı Eldar Əzizov deyib.