Hərbi şəhərçikdə bıçaqlanma

Bakının Binəqədi rayonunda bıçaqlanma hadisəsi baş verib. Qanlı hadisə “hərbi şəhərcik” adlanan ərazidə, 37 saylı evin qarşısında meydana gəlib.

Məlumata görə, həmin ünvanda yaşayan Oruclu Vüsal Zeytun oğlu aldığı bıçaq xəsarətləri ilə ağır vəziyyətdə 1 saylı xəstəxanaya çatdırılıb. Gətirilən zaman ona bir neçə bıçaq xəsarəti yetirildiyini müəyyən edən həkim heyəti yaralını dərhal əməliyyat otağına qaldırıb.

Hadisə barədə məlumat əldə edən rayon polisi əməliyyatdan sonra vəziyyəti ağır olan yaralının ilkin ifadəsini ala bilməyib. Bununla belə, 18 yaşlı Vüsalın yaxınlarının bildirdiyinə görə, onu qonşuluqda yaşayan Mayıl adlı bir tanışı bıçaqlayıb.

Binəqədi rayon polis idarəsi 4-cü polis bölməsindən verilən məlumata görə, polis əməliyyatçıları faktda şübhəli bilinən bir nəfəri həbs edib. Sadəcə ilkin istintaq araşdırmaları aparıldığından onun şəxsiyyəti hələlik açıqlanmır.

Artıq faktla bağlı cinayət işi başlanılıb və araşdırmalar davam edir.

ANS