Yüzlərlə itkin düşən burada yandırılıb - Ölüm düşərgəsi TAPILDI

Meksikanın Xalisko əyalətinin dağlarında fermada narkotik karteli ilə əlaqəli ölüm düşərgəsinin dəhşətli qalıqları aşkar edilib.

Lent.az xarici KİV-ə istinadla bildirir ki, bu, anonim mənbənin yeri göstərməsindən sonra məlum olub. Oğurluq qurbanlarının cəsədlərinin yandırıldığı güman edilən gizli krematoriyalar hüquq-mühafizə orqanları üçün şok edici kəşfə çevrilib.

Yerli hakimiyyət orqanlarının bildirdiyinə görə, fermada tapılan tapıntılar arasında sümüklər, güllə gilizləri, 400-dən çox paltar və ən azı 200 cüt ayaqqabı var. İlkin dəlillər onu göstərir ki, bu yer təkcə krematoriya kimi deyil, həm də kartelə cəlb olunanlar üçün təlim mərkəzi kimi istifadə olunub və burada döyüş texnikası öyrədilib.

Qalıqları yandırmaq üçün nəzərdə tutulmuş primitiv sobalarla yanaşı, səlahiyyətlilər təxminən 200 nəfərin saxlanıldığı qeyri-insani şəraitdən xəbər tutublar. Düşərgədən qaçan İndira Navarro bildirib ki, mafiyaya cəlb olunanlara təlim keçiblər və bu zaman onlar bir-birləri ilə vəhşicəsinə rəftar ediblər.

“Çoxları məşqə dözə bilmədi. Bəziləri şikayət etdiyi üçün öldürüldü, bəziləri isə bu dəhşətli şəraitə tab gətirə bilməyib öldü” - Navarro deyib.

Onun ifadəsinə görə, məhbusları məzar çuxurları qazmağa məcbur ediblər. Bu çuxurlar daşlarla örtülür və sonra yandırılmaq üçün benzinlə doldurulurdu.

"Biz izlərimizi örtmək üçün üç dəfə benzin istifadə etdik" deyə Navarro bildirib. Onun sözlərinə görə, burada müvəffəqiyyətlə işə götürülənlər təlim keçdikdən sonra ölkənin digər bölgələrində rəqiblərlə döyüşmək üçün missiyalara göndəriliblər.

Tapılan materiallar arasında 2024-cü ilin fevralında yoxa çıxan Eduardo Lerma Nitonun sevgilisinə ünvanlanmış şəxsi məktubu da var. O, məktubunda bir daha qayıtmayacağı təqdirdə sevgilisindən onu xatırlamasını xahiş edib.

Xalisko Meksikanın ən problemli bölgələrindən biri hesab olunur, Milli İzləmə Komissiyasının məlumatına görə, burada 15 mindən çox insan itkin düşüb. Ekspertlər bildirirlər ki, bu, narkokartellərin probleminin miqyasını və onların ərazini zorakılıq və qorxu qaynağına çevirən sistemli hərəkətlərini göstərir.

Navarro səlahiyyətliləri ərazini daha ətraflı təftiş etməyə çağırıb. Axtarışlarda insan qalıqlarını müəyyən edə bilən xüsusi təlim keçmiş itlərdən istifadə də nəzərdə tutulur.