Ləyaqətsiz, harın övladlar atanı vəzifədən etdi

Türkmənistan prezidenti Qurbanqulu Berdıməhəmmədov baş nazirin müavini, prezident aparatının işlər idarəsinin rəisi Xocaməhəmməd Məhəmmədovu övladlarının ləyaqətsiz davranışına görə istefaya göndərib.

Lent.az-ın «RİA Novosti»yə istinadən məlumatına görə, bu barədə yerli televiziya xəbər yayıb.

Uyğun qərar Nazirlər Kabinetinin genişləndirilmiş iclasında Daxili İşlər Nazirliyinin informasiyalarından sonra qəbul olunub.

Daxili işlər naziri İsgəndər Məlikovun billdirib ki, X.Məhəmmədovun iki oğlu və kürəkəni Aşqabadın əyləncə mərkəzlərində, Xəzər sahilindəki «Avaza» turizm zonasında, hətta təyyarədə dəfələrlə dava salıb, qalmaqal yaradıblar.

Məhəmmədov nazirlər kabinetində ticarət və özəl şirkətlər üzrə sahələrə nəzarət edib. O, Türkmənbaşının prezidentliyi dövründən hökumətdə çalışıb.