Vergi İdarəsinin direktoru istefa verdi, respublikaçılar qane olmurlar...
ABŞ-da mühafizəkar qruplara qarşı vergi siyasətində qərəzli münasibətin ortaya çıxması aləmi qarışdırıb.
Lent.az-ın “Reuters” agentliyinə istinadən verdiyi məlumata görə, ilkin araşdırmaların nəticəsi açıqlanandan sonra dünən ABŞ Vergi İdarəsinin direktoru Stiven Miller istefa verib.
Stiven Millerin istefası xəbərini ABŞ prezidenti Barak Obama keçirdiyi mətbuat konfransında açıqlayıb. Barak Obama deyib ki, Vergi İdarəsinin direktorunun istefasını ABŞ Xəzinəsinin katibi Ceykob Lyu tələb edib. O, gələcəkdə sui-istifadə hallarının qarşısının alınması üçün Vergi İdarəsinin fəaliyyətinə nəzarətin artırılmasının zəruri olduğunu bəyan edib. Barak Obama deyib ki, heç bir dövlət qurumunun belə davranışına qarşı dözümlü olmayacaq. Respublikaçılar Partiyası isə bəyan edib ki, Barak Obama Vergi İdarəsi ilə bağlı araşdırmanın yekunlaşmasına mane olmamalıdır.
Qeyd edək ki, Stiven Miller bundan əvvəl günahını etiraf edib, mühafizəkar qruplara qarşı vergi siyasətinin sərtləşməsinin bu qruplardan olan şikayətlərin kəskin şəkildə artması ilə izah edib.