İran hakimiyyəti ərzaq ehtiyatı yığır

İRİNN-in məlumatına görə, ölkədən çıxarılması yasaqlanan 22 adda gündəlik tələbat mallarının və ərzaq məhsullarının siyahısı açıqlanıb.

Həmin siyahıya ilk növbədə bunlar daxil edilib: düyü, bitki yağı, qənd, ət, quş, yumurta, çörək, süd məhsulları (süd, yoğurt, kərə yağı, pendir), un məmulatları, paxlalılar (noxud, lobya) və dənli bitkilər (qarğıdalı, vələmir), çay, kartof, soğan, pomidor, tomat, meyvələrdən (alma, banan), sitrus meyvələrindən (naringi, portağal), paltar yuyucu tozlar, polad, sement, kağız (qəzet çapı və nəşr üçün), avtomobil təkəri (minik, yük və avtobus).

«Əgər bu məhsulların istehsalçıları istehsalı artırmasa, o zaman qiymətlər bazarda durmadan artacaq» - deyə, bir müddət öncə İranın ticarət naziri Mehdi Qəzənfəri bildirmişdi.

Bahalaşmanın qarşısını almaq, 13 növ ərzaq və gündəlik tələbat malların ehtiyatını təmin etmək məqsədi ilə Ticarət Nazirliyi istehsalçılarla razılaşma imzalayıb.

Xatırladaq ki, sentyabrda Kənd Təsərrüfatı Nazirliyi sərmayə, sahibkarlıq fəaliyyət və ticarətin inkişafı idarəsinin direktoru Abbas Hacian agentliyə müsahibəsində demişdi ki, sentyabrın 18-dən etibarən 800 adda kənd təsərrüfatı məhsulunun idxalatına qadağa qoyulub.

Nazirlik bu yasağı ölkə prezidentinin idxalat və ixracat haqda qanuna, habelə onun icrası çərçivəsində tətbiq edildiyini bildirmişdi.

Direktorun sözlərinə görə, göstərilən tarixdən etibarən həmin məhsulların sifarişinin qeydə alınması da qadağan olunub. Bununla yanaşı, qanun qüvvəyə mindiyi gündən etibarən Kənd Təsərrüfatı Nazirliyi bu sahənin məhsulları idxalının təşkilinə məsuliyyət daşıyır. Sentyabrın 18-ə qədər qeydə alınmış sifarişlərin icrasına isə sifarişçi təşkilatlar məsuliyyət daşıyacaq.

Sədrəddin Soltan