835
10:43
14 Sentyabr 2020

“Yüksəliş” imtahanında zəhərlənənlər evə buraxılıb

Həftəsonu “Yüksəliş” müsabiqəsinin imtahanı zamanı zəhərlənən şəxslərin hamısı xəstəxanadan evə buraxılıb.

Lent.az bildirir ki, bu barədə “Qafqazinfo”ya “Yüksəliş” İctimai Birliyinin ictimaiyyətlə əlaqələr şöbəsinin rəhbəri Aliyə Əliyeva məlumat verib.

O qeyd edib ki, zəhərlənənlərin hamısı elə həmin gün 1 və 3 saylı xəstəxanaya yerləşdirilmişdi: “Bütün xəstələr ambulator rejimdə müalicə aldıqdan sonra evə buraxıldı. Hazırda xəstəxanada müalicəsini davam etdirən yoxdur. O cümlədən, “Çağrı” mərkəzimiz 1000-ə yaxın insanın hamısıyla bir-bir əlaqə saxladı. Hər kəsin vəziyyəti yaxşıdır.

Buna baxmayaraq, hazırda Qida Təhlükəsizliyi Agentliyindən ekspertizanın rəyini gözləyirik. Bu, bizim üçün bir məyusluq idi. Zəhərlənənlərin əksəriyyəti işçi və texniki heyət idi. İştirakçılar isə təqribən 20 faiz təşkil edirdi.

Ona görə ekspertizanın nəticəsini gözləyirik. Hazırda işçilərin hamısı işə çıxır. Biz digər imtahanlarımızı psixoloji məsələlərə görə yarımçıq saxlamalı olduq. Hazırda imtahanlar üzərində işləyirik”.

Xatırladaq ki, sentyabrın 12-də “Yüksəliş” müsabiqəsinin əyani mərhələsinin saat 15:00-da başlayan ikinci imtahanında 24 mərkəzdən 5-ində qidadan zəhərlənmə halı qeydə alınmışdı.

Dİgər xəbərlər