Azərbaycanın İnsan Hüquqları üzrə Müvəkkili (Ombudsman) Səbinə Əliyevanın tapşırığı ilə Milli Preventiv Qrupun (MPQ) üzvləri Ədliyyə Nazirliyi Penitensiar Xidmətinin 6 və 17 saylı cəzaçəkmə müəssisələrinə əvvəlcədən xəbərdarlıq etmədən başçəkmələr həyata keçirib.
Lent.az qurumun saytına istinadla xəbər verir ki, başçəkmələr BMT-nin İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyasının Fakültativ Protokolu və Azərbaycanın İnsan Hüquqları üzrə Müvəkkili (Ombudsman) haqqında Konstitusiya qanununun tələbləri əsasında təşkil olunub. Başçəkmələr zamanı bu müəssisələrdə cəza çəkən məhkumların saxlanılma şəraiti, rəftar məsələləri, qidalanma, tibbi yardım və digər hüquqların təmin olunması vəziyyəti araşdırılıb.
6 saylı Cəzaçəkmə Müəssisəsinə başçəkmə çərçivəsində bir çox məhkum, o cümlədən internet saytlarında qida qəbulundan imtina etməsi ilə bağlı barəsində məlumat yayılmış Emin Saqiyev konfidensial qaydada qəbul olunub. O, barəsində olan məhkəmə qərarından narazılığını əsas göstərərək bu addımı atdığını bildirib.
17 saylı Cəzaçəkmə Müəssisəsinə başçəkmə çərçivəsində cəza çəkdiyi müəssisənin dəyişdirilməsi tələbini əsas göstərərək qida qəbulundan imtina etdiyini qeyd edən Vahid Əliyev də qəbul olunub. Ona hüquqları izah olunmaqla müraciətləri qəbul edilib.
MPQ-nin üzvləri tərəfindən adıçəkilən məhkumlara qida qəbulunu bərpa etmələri ilə bağlı, habelə müəssisə rəhbərliyinə və tibbi-sanitar hissəyə məhkumların səhhətinin həkim nəzarətində saxlanılması məqsədilə müvafiq tövsiyələr verilib.
Qəbullar zamanı məhkumlara Ombudsmanın səlahiyyətləri barədə məlumat və qaldırdıqları məsələlər üzrə hüquqi məsləhətlər verilib, ərizələri qəbul olunub, bir sıra müraciətlər yerində təmin edilib.
Başçəkmənin yekunları ilə əlaqədar aidiyyəti dövlət qurumlarına müraciət olunacaq.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
