941
15:52
19 Aprel 2020

"Yorulmaz fəaliyyətiniz biz ağsaqqallarda da böyük qürur hissi yaradır" - Sədrdən məktub

Koronavirusla mübarizə tədbirləri çərçivəsində Azərbaycan hökumətinin gördüyü işlərə görə hər gün ölkənin müxtəlif yerlərindən prezidentə təşəkkür məktubları gəlir. Növbəti məktub Kürdəmir rayon Ziyalılar Cəmiyyətinin sədri Sabir Novruzovdan gəlib. O, öz məktubunda prezidentin apardığı uğurlu siyasətlə qürur duyduqlarını bildirərək, ona bu şərəfli yolda uğurlar arzu edib.

Lent.az S.Novruzovun həmin məktubunu təqdim edir:

"Möhtərəm cənab Prezident.

Bütün dünyada koronovirus pandemiyasının hökm sürdüyü bir zamanda siz xalqımızı bu bəlanın fəsadlarından uğurla qoruyursunuz. Sizin uğurlu siyasətinizin nəticəsində bu pandemiyanın ölkəmizə təsirləri minimuma endirilib.

Möhtərəm cənab Prezident, hər bir vətəndaşınızın, xüsusən də yaşlı insanların sağlamlığını, rifahını düşünərək həyata keçirdiyiniz bu tədbirlər, yorulmaz fəaliyyətiniz hamı kimi, biz ağsaqqallarda da böyük qürur hissi yaradır, sizin daim xalqımızın yanında olduğunuzu sübut edir. Hazırda respublikamızın bütün ağsaqqalları, yetişməkdə olan gənc nəsil yekdilliklə bu fikirdədirlər ki, siz ulu öndər Heydər Əliyevin layiqli davamçısı olaraq Azərbaycanın vətənpərvər, mərhəmətli, qətiyyətli və müdrik rəhbərisiniz. Qəbul etdiyiniz hər bir humanist qərarda xalqı düşünürsünüz, daim xalqımızın yanındasınız və həyata keçirdiyiniz siyasətdə, verdiyiniz qərarlarda bu hər zaman özünü göstərir. İnanırıq ki, bu çətin günlərimiz geridə qalacaq. Sizə məsuliyyətli və şərəfli işinizdə yeni uğurlar arzu edirəm. Azərbaycan xalqı sizinlə güclüdür. Biz sizə güvənirik və sizin yanınızdayıq".