Evlərdən qızıl oğurlayıb su qiymətinə satdı

Qubada oğurluq baş verib.

Daxili İşlər Nazirliyi mətbuat xidmətinin Quba rayonundakı regional qrupundan Lent.az -a verilən məlumata görə, Quba rayon Polis Şöbəsinin əməkdaşları hadisə ilə bağlı əməliyyat-axtarış tədbirləri keçiriblər. Nəticədə rayonun Bağbanlı kənd ərazisində yerləşən fərdi yaşayış evlərinin birindən qızıl-zinət əşyaları oğurlayaraq zərərçəkənlərə xeyli miqdarda maddi ziyan vuran şəxs saxlanılıb. Araşdırmalarla onun həmin kənd sakini 19 yaşlı Raman Mirzəyev olduğu müəyyən edilib.

R.Mirzəyevin ətrafında aparılan tədbirlər nəticəsində onun törətdiyi başqa bir cinayət hadisəsinin də üstü açılıb. Məlum olub ki, saxlanılan şəxs Xaçmaz rayon ərazisində də analoji cinayət hadisəsi törədərək, rayonda yerləşən evlərin birinə qanunsuz daxil olmaqla oradan zinət əşyaları oğurlayıb.

Dindirilmə zamanı həmin şəxs törətdiyi cinayət əməllərini etiraf edərək, oğurladığı qızıl-zinət əşyalarını Xaçmaz rayon ərazisində dəyərindən ucuz qiymətə satdığını bildirib. Polis əməkdaşları qızılların satıldığı yeri müəyyənləşdirərək, onları maddi sübut kimi götürüblər.

Faktlarla bağlı cinayət işi başlanılıb, araşdırma aparılır.