Meriya sahibkarlardan nə istəyir? - RƏSMİ CAVAB

Xəbər verdiyimiz kimi, Bakı Şəhər İcra Hakimiyyəti (BŞİH) sahibkarlara, müəssisə və təşkilat rəhbərlərinə istifadələrində olan obyektlərin qarşısında yerləşən ərazilərdə mövcud yaşıllıqların günün tələbləri səviyyəsinə çatdırılması, yeni yaşıl guşələrin yaradılması və saxlanılması barədə müraciət edib.

Bu barədə Lent.az -a açıqlama verən Bakı Şəhər İcra Hakimiyyətinin mətbuat xidmətinin rəhbəri İsrafil Kərimov bildirib ki, meriya sahibkarlara, müəssisə və təşkilat rəhbərlərinə ancaq tövsiyə verib:

“Obyektlərin qarşısında gözəl guşə zövqlə olmalıdır. Həmin yaşıllıqları sahibkarlar, rəhbərlər özləri seçməlidir və onlar elə olmalıdır ki, əraziyə yaraşsınlar. Bununla bağlı isə BŞİH tərəfindən heç bir tələb yoxdur”.

Qeyd edək ki, Yaşıl guşələrin yaradılması və qorunması məqsədilə Bakı Şəhər İcra Hakimiyyətinin başçısı müvafiq Sərəncam imzalayıb. Sənəddə bildirilib ki, ölkə rəhbərinin siyasəti nəticəsində Bakı şəhəri ciddi inkişaf nümayiş etdirib, şəhərin yaşıllaşdırılması sahəsində önəmli işlər görülüb. Yaşıllaşdırma sahəsində uğurlar əldə etmiş şəhərlərin təcrübəsində sahibkarlar, idarə və müəssisə rəhbərləri tərəfindən ticarət və digər qeyri-yaşayış obyektlərinin qarşısında yaşıl guşələrin yaradılması və saxlanılması praktikası mövcüddur.

Bildirək ki, sözügedən sərəncam yaşıllaşdırılması dövlət vəsaiti hesabına həyata keçirilməsi nəzərdə tutulan ərazilərə şamil edilmir.