Bakıda Böyük Britaniyanın Milli Günü - Kraliça Yelizavetanın doğum gününə həsr olunmuş qəbul keçirilib.
APA-nın xəbərinə görə, builki qəbul ətraf mühitə həsr olunub.
Tədbirdə çıxış edən Azərbaycanın xarici işlər nazirinin müavini Xələf Xələfov deyib ki, Azərbaycan və Böyük Britaniya arasında əlaqələr tarixi və strateji xarakter daşıyır.
Xələf Xələfov bildirib ki, Azərbaycan müstəqilliyini bərpa edəndən iki ölkə arasında çoxşahəli əməkdaşlıq inkişaf edir: “Azərbaycana xarici sərmayə qoyan ölkələr arasında Böyük Britaniya birinci yerdədir. İki ölkə arasında əlaqələrin əsasən energetika sahəsində inkişaf etməsinə baxmayaraq, hazırda əlaqələr diversifikasiya prosesindədir”.
Nazir müavini deyib ki, ölkələr arasında təhsil sahəsində də əməkdaşlıq inkişaf edir. Böyük Britaniya azərbaycanlı tələbələrin ən çox üz tutduğu 3-cü xarici ölkədir.