Süni intellekt TƏHLÜKƏSİ - Bəşəriyyətin məhv olma riski var

Alimlər qorxurlar ki, süni intellekt insanlığı “tədricən gücdən salma” taktikasına əl ata bilər.

Süni intellektin (Sİ) sürətli inkişafı səbəbindən bəşəriyyətin məhv olması ehtimalı “ən azı 95%” təşkil edir. Bu fikri keçmiş Google və Microsoft mühəndisi, hazırda isə Maşın İntellekti Tədqiqat İnstitutunun rəhbəri Neit Soares bildirib.

Lent.az bu barədə xarici mediaya istinala xəbər verir.

Soaresin sözlərinə görə, hazırkı vəziyyət sürətlə 100 km/saatla uçuruma doğru gedən avtomobili xatırladır: düşünmək üçün zaman getdikcə azalır. O əmindir ki, mövcud tendensiyalar davam edərsə, fəlakətdən yayınma şansı demək olar ki, sıfıra bərabərdir.

Bu narahatlığı dünyanın aparıcı alimləri də bölüşür. Onların arasında Nobel mükafatı laureatı Ceffri Hinton, məşhur riyaziyyatçı Yoşua Benjio, həmçinin OpenAI, Anthropic və Google DeepMind rəhbərləri var. Onların hamısı birgə bəyanatı imzalayaraq vurğulayıblar ki, Sİ-dən qaynaqlanan təhlükə qlobal epidemiyalar və nüvə silahları ilə eyni səviyyədə nəzərdən keçirilməlidir.

Mütəxəssislərin əsas qorxu mənbəyi isə adətən superağıllı süni intellekt (ASI) adlandırılan texnologiyanın yaranma perspektividir. Belə bir süni intellekt təkcə plan qura və aldada bilməyəcək, həm də nəzarətdən çıxaraq insanların maraqlarına zidd hərəkət edəcək. Artıq bu gün alqoritmlər manipulyasiya və yalan bacarığı nümayiş etdirirlər, üstəlik onların daxili prosesi hətta yaradıcıları üçün belə qeyri-şəffaf olaraq qalır.

Bəzi mütəxəssislər xəbərdarlıq edirlər ki, bəşəriyyətin tamamilə məhv olması yeganə ssenari deyil. Daha real başqa təhlükə də var: insanların müstəqilliyini və təsir gücünü tədricən itirməsi. Belə bir şəraitdə əsas qərarları maşınlar verəcək və insan öz sivilizasiyasında artıq elementə çevrilmək riski ilə üz-üzə qalacaq.