Qənirə Paşayeva Hollandiyadakı türk gənclərlə görüşüb

Millət vəkili Qənirə Paşayeva Amsterdamda Vrij Universitetində Hollandiyadakı türk tələbələrinin təmsil olunduğu təşkilatların rəhbərləri ilə görüşüb. Lent.az-ın məlumatına görə, görüşdə millət vəkili Qənirə Paşayeva bildirib ki, dünyanın hər yerində, o cümlədən Hollandiyada yaşayan minlərlə türk əsilli tələbə və gənclərimiz Ermənistanın işğal etdiyi Azərbaycan torpaqlarında törətdiyi vandalizm aktlarını, soyqırımları, Azərbaycan həqiqətlərini yaşadıqları ölkələrin ictimaiyyətinə və beynəlxalq ictimaiyyətə daha geniş çatdırılması və qondarma “erməni soyqırımı” yalanlarının qarşısının alınması istiqamətində səylərini daha da artırmalıdırlar.

Q.Paşayeva Vrij universitetində keçən görüş zamanı Hollandiyada yaşayan, dünyanın müxtəlif coğrafiyalarından bu ölkəyə gəlmiş türk kökənli gənclərin, tələbələrin və onların təşkilatlarının koordinasiya olunmuş şəkildə, bir-birlərinə sıx dəstək vermələrinin və Türk dünyasını narahat edən bütün problemlərin həllinə dəstək göstərmək üçün bərabər çalışmalarının daha da artırılmasının vacibliyini də diqqətə çatdırıb.

Görüşün sonunda millət vəkili Qənirə Paşayeva tələbə təşkilatlarına Azərbaycan həqiqətlərinə dair materiallar təqdim edib.