Əyləc işləməsə avtomobili necə dayandırmaq olar? - ARDICILLIQ

Avtomatik sürətlər qutusu olan avtomobildə əyləcin sıradan çıxması son dərəcə təhlükəli vəziyyətdir. Əsas qayda panikaya qapılmamaqdır.

Lent.az xəbər verir ki, avtomobil təlimatçısı belə vəziyyətdə necə hərəkət etməyi izah edib.

Hərəkət ardıcıllığı:

Xəbərdarlıq: Qəza işıqlarını yandırın, sükanı iki əllə möhkəm saxlayın və digər sürücülərə yol boşaltmaları üçün faralar və siqnal vasitəsilə xəbər verin.

Yoxlama: Əyləc pedalına bir neçə dəfə kəskin basmağı yoxlayın. Bəzən bu, sistemdə təzyiqin bərpasına kömək edə bilər. Əgər nəticə vermirsə, növbəti addımlara keçin.

Sürəti sürətlər qutusu ilə azaltmaq:
• Mühərriki ayırın: Əgər qaz pedalı ilişibsə, selektoru N (neytral) rejiminə keçirin. Bu zaman mühərrik təkərlərdən ayrılır və sürət artımı dayanır.
• Aşağı sürətlərə keçin: Müasir avtomatik sürətlər qutularının çoxunda manual rejim var. Aşağı pillələrə keçdikdə mühərrikə düşən yük artır və avtomobilin sürəti azalır. Köhnə avtomatlarda isə selektoru L və ya 1, 2 işarələrinə keçirmək kifayətdir.

Əyləc sisteminin istifadəsi: Sürət azaldıqdan sonra dayanacaq əyləcini (əl əyləci) yavaş-yavaş dartın. Kəskin dartmaq nəzarətsiz sürüşməyə səbəb ola bilər.

Ətraf mühitdən yardım: Yol relyefindən istifadə edin. Əgər yuxarı qalxan hissə varsa, maşını ora yönləndirin ki, təbii yolla sürət azalsın. Düz hissələrdə isə maşını bordyura və ya qum yığınına yüngül sürtməklə inersiyanı azaltmaq olar.

Vacib xəbərdarlıqlar (avtoinstruktordan):

•   Alovu (kontakı) tam söndürməyin, çünki bu, sükan və əyləc gücləndiricilərinin işləməsini dayandıracaq.
•   Selektoru P (parkinq) və ya R (geri) rejiminə hərəkət zamanı keçirməyin. Bu, sürətlər qutusuna zərər verə bilər və avtomobilə nəzarəti itirməyinizə səbəb olar.
•   Maşın tam dayandıqdan sonra onu sabitləyin, selektoru P rejiminə keçirin və qəza dayanma nişanını qoyun. Unutmayın: belə vəziyyətdən sonra həmin avtomobillə hərəkəti davam etdirmək qadağandır.