“Dədə Qorqud”-un dondurmalarında “S.aureus” bakteriyaları tapıldı

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən “Dədə Qorqud” Müstəqil Kiçik Müəssisəsinə məxsus istehsalat sahəsində aparılan yoxlama zamanı müəssisənin anbarında olan hazır məhsullardan nümunələr götürülərək laborator müayinəyə göndərilib.

Lent.az-ın İqtisadi İnkişaf Nazirliyinin rəsmi saytına istinadən verdiyi məlumata görə, laborator müayinələr nəticəsində müəssisədə istehsal edilən falqa qablaşdırmada olan “Star” südlü dondurmalarında turşuluğun normadan az, mezofil-aerob və fakültativ-anaerob mikroorqonizmlərin sayının normadan çox, tərkibində bağırsaq çöpləri qrupundan olan bakteriyalar (koliformlar) və “S.aureus” bakteriyalarının (stafilakok) olduğu aşkarlanıb.

Eyni zamanda “Star” plombir dondurmalarında yağın kütlə payının etiket göstəricisindən az, mezofil-aerob və fakültativ-anaerob mikroorqonizmlərin sayının normadan çox, tərkibində bağırsaq çöpləri qrupundan olan bakteriyalar (koliformlar) və “S.aureus” bakteriyalarının (stafilakok) olduğu, “QOLD STAR” plombir dondurmasında yağın kütlə payının etiket göstəricisindən az, mezofil-aerob və fakültativ-anaerob mikroorqonizmlərin sayının normadan çox, tərkibində bağırsaq çöpləri qrupundan olan bakteriyaların (koliformlar) olduğu, “Dalila” dondurmasında yağın kütlə payının etiket göstəricisindən az, mezofil-aerob və fakültativ-anaerob mikroorqonizmlərin sayının normadan çox, tərkibində “S.aureus” bakteriyalarının olduğu, polietilen qablaşdırmada olan “Star” dondurmasında saxarozanın, quru maddənin kütlə payının və turşuluğun normadan az, mezofil-aerob və fakültativ-anaerob mikroorqonizmlərin sayının normadan çox, tərkibində bağırsaq çöpləri qrupundan olan bakteriyalar (koliformlar) və “S.aureus” bakteriyalarının (stafilakok) olduğu aşkar edilib.

Laborator müayinələrin nəticələrinə əsasən, insan orqanizmi üçün təhlükəli 1989,92 kq dondurmanın qanunvericiliyə müvafiq qaydada məhv edilməsi barədə Dövlət Xidməti tərəfindən “Dədə Qorqud” Müstəqil Kiçik Müəssisəsinə icrası məcburi göstəriş verilib.