Əlverişsiz hava şəraiti aradan qalxır

Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, yaxın 2 gündə Abşeron yarımadasında arabir güclənən xəzri küləyi və meteoroloji amillərin mülayim tərəddüdü meteohəssas insanlar üçün nisbətən əlverişlidir.

Qeyd edək ki, Ekologiya və Təbii Sərvətlər Nazirliyinin Milli Hidrometeorologiya Departamenti iyulun 8-də Bakı və Abşeron yarımadasında müşahidə olunan sinoptik şərait ilə bağlı xəbərdarlıq edib. Xəbərdarlıqda qeyd olunurdu ki, iyul ayının ilk günlərində əsən güclü şimal-qərb küləkləri Abşeron yarımadasında yer səthindən toz hissəciklərinin davamlı olaraq dəniz üzərinə qovulmasına şərait yaradıb. İyulun 7-də küləyin zəifləməsi və cənub, cənub-şərq küləyi ilə əvəz olunması, “istilik dalğası”nın təsiri (burada maksimal temperatur 40 dərəcəyədək yüksəlmişdir), dəniz üzərindən buxarlanmanın bir qədər artması və havada olan toz hissəciklərinin buxarla tutulub saxlanması nəticəsində zəif duman effekti yaranıb.

Əlverişsiz meteoroloji şəraitlə bağlı iyulun 8-i səhər saatlarında zərərli qaz qarışıqlarının konsentrasiyasının əvvəlki günlərə nisbətən toz istisna olmaqla artımı müşahidə olunub. Azot 4-oksid sutka ərzində sanitar normadan 2.7, furfurol 4.2, dəm qazı 1.6, hidrogen sulfid 1.1 dəfə çox olub. Ekologiya və Təbii Sərvətlər Nazirliyinin Milli Hidrometeorologiya Departamenti iyulun 9-dan 11-dək hava şəraitində gözlənilən güclü şimal-qərb küləyinin yenidən üstünlük təşkil etməsinin çirklənmə səviyyəsinin azalmasına və zəif dumanın səpələnməsinə səbəb olacağını bildirmişdi.