72 yaşlı abituriyent gənclərdən daha təpərli olub...

İyulun 3-də keçirilən III ixtisas qrupu üzrə imtahanlarda 72 yaşlı abituriyent bu il orta məktəbi bitirən və attestat alan məzunların əhəmiyyətli qismi ilə müqayisədə daha yüksək nəticə göstərib.

Lent.az-ın verdiyi məlumata görə, bunu Tələbə Qəbulu üzrə Dövlət Komissiyasının sədri Məleykə Abbaszadə söyləyib. Məleykə Abbaszadə deyib ki, 72 yaşlı kişi 100 baldan yuxarı nəticə göstərib: “Ancaq bu il orta məktəbi bitirən, imtahan verərək attestat alan məzunların əhəmiyyətli qismi 0-100 bal arasında nəticə göstərib. 72 yaşlı insan ixtisas seçimi üçün lazım olan keçid balını toplaya bilməsə də, onun bu il attestat almış abituriyentlərdən daha yüksək nəticə göstərməsi diqqət çəkməyə bilməz”.

Qeyd edək ki, bu il ixtisas III qrupu üzrə keçid balı 250 baldır. 250-350 bal toplayan abituriyentlər pullu ixtisaslar seçə bilərlər. 350 bal və daha yüksək nəticə göstərənlərə isə dövlət sifarişli pulsuz ixtisaslar seçmək imkanı verilir.