“Avropa Məhkəməsinin müəyyənləşdirdiyi cərimələr tam ödənib”

“İnsan Haqları üzrə Avropa Məhkəməsinin Azərbaycanla bağlı qəbul etdiyi qərarlar vaxtlı-vaxtında icra olunur”.

APA-nın məlumatına görə, bunu Azərbaycan Ali Məhkəməsinin sədri Ramiz Rzayev deyib.

Onun sözlərinə görə, Azərbaycan Avropa Şurasına üzv olandan bəri ölkə ilə bağlı 16 məhkəmə qərarı qəbul edilib: “Bu, çox böyük rəqəm deyil. Elə ölkələr var ki, onların barəsində ildə 200-300 qərar qəbul olunur. Mən demirəm ki, bizdə hər şey qaydasındadır, amma çalışırıq ki, yaxşı olsun. Avropa Məhkəməsi də mahiyyətə baxmır, prosedur məsələlərinə baxır, biz də qəbul olunan qərarları birmənalı təmin edirik”.

R.Rzayev məhkəmənin müəyyənləşdirdiyi cərimələrin tam ödəndiyini də vurğulayıb.

Ali Məhkəmənin sədri hazırda Avropa Məhkəməsi ilə 30-dan çox iş üzrə kommunikasiya aparıldığını da vurğulayıb: “Bunlar, əsasən, məhkəmə qərarlarının icrası, mülkiyyətlə bağlı məsələlərdir. Bu vaxta qədər məhkəməyə 1000-ə yaxın ərizə verilib, onların yalnız 35-i kommunikasiyadadır. Bizim ali məqsədimiz budur ki, yerli məhkəmələr insanları, vətəndaşları o səviyyədə qorusun ki, Avropa Məhkəməsinə müraciətə ehtiyac yaranmasın”.