İmtahan vermədən tələbə olacaqlar
27 may 2010 11:00 (UTC +04:00)

İmtahan vermədən tələbə olacaqlar

Ali məktəblərə imtahansız qəbul olunacaq şəxslər TQDK-da qeydiyyatdan keçməlidir

Ali məktəblərin müvafiq ixtisaslarına imtahansız qəbul olunacaq dünya fənn olimpiadalarının, yüksək səviyyəli beynəlxalq müsabiqələrin və yarışların qalibləri iyunun 1-dən öz sənədlərini Tələbə Qəbulu üzrə Dövlət Komissiyasına (TQDK) və komissiyanın regional bölmələrinə təqdim edəcəklər.

Lent.az-ın məlumatına Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirdiyi mətbuat konfransında belə deyib. Onun sözlərinə görə, Onun sözlərinə görə, “Təhsil haqqında” qanunun 26.5-ci maddəsinə əsasən, idman sahəsində olimpiya, dünya və Avropa çempionatlarının qalibləri, təhsil sahəsində dünya fənn olimpiadalarının, musiqi və incəsənət sahəsində dünya və beynəlxalq müsabiqələrin qalibləri müvafiq ixtisaslar üzrə ali təhsil müəssisələrinə müsabiqədənkənar qəbul olunurlar. Bununla bağlı sözügedən şəxslər müvafiq ixtisaslar üzrə ali təhsil müəssisələrinə müsabiqədənkənar qəbul olunmaq üçün nailiyyətlərini təsdiq edən sənədlərin əslini və surətini təqdim etməlidirlər.

Məleykə Abbaszadə bildirib ki, ali məktəblərə imtahansız qəbul olunacaq şəxslər yalnız TQDK-nın özündə və ya Naxçıvan, Gəncə, Quba, Şəki, Lənkəran regional bölmələrində qeydiyyatdan keçməlidirlər. Onun sözlərinə görə, təqdim olunan sənədlər yoxlandıqdan sonra TQDK onlarla bağlı öz qərarını elan edəcək.

Elxan SALAHOV
# 224

Oxşar yazılar