Binəqədidə Beynəlxalq Müəllim Günü qeyd edildi - FOTO

Bu gün Binəqədi Rayon İcra Hakimiyyətinin və Azərbaycan Təhsil İşçiləri Azad Həmkarlar İttifaqının Binəqədi Rayon Komitəsinin birgə təşkilatçılığı ilə “Oğuzxan” şadlıq evində 5 oktyabr – Beynəlxalq Müəllim Günü münasibətilə tədbir keçirilib. RİH ictimai-siyasi və humanitar məsələlər şöbəsinin müdiri Natiq Əliyevin verdiyi məlumata görə, tədbiri giriş sözü ilə açan RİH başçısı Xaləddin İsgəndərov Beynəlxalq Müəllim günü münasibətilə tədbir iştirakçılarının timsalında bütün Binəqədi müəllimlərini təbrik edərək, onlara uğurlar arzulayıb. 5 oktyabr – Beynəlxalq Müəllim gününün qeyd edilməsinə dair qərarın ilk dəfə 1966-cı ildə YUNESKO-da imzalandığını bildirən Xaləddin İsgəndərov hazırda dünyanın 100-dən çox ölkəsində oktyabrın 5-də müəllimlərin peşə bayramının qeyd edildiyini, Müstəqil Azərbaycanda isə bu tarixin 1993-cü ildən qeyd edildiyini diqqətə çatdırıb.

Daha sonra çıxış edən Bakı Şəhər Təhsil İdarəsinin müdir müavini, filologiya elmləri doktoru, professor, əməkdar müəllim Hüseyn Əsgərov, Azərbaycan Təhsil İşçiləri Azad Həmkarlar İttifaqının Binəqədi rayon Komitəsinin sədri, əməkdar müəllim Almaz Hacıyeva və başqaları bu gün dövlət və dövlət başçısı tərəfindən təhsil sahəsinə, təhsil işçilərinə göstərilən diqqət və qayğıdan, əldə olunan nailiyyətlərdən, qarşıda duran vəzifələrdən danışıblar.

Sonda tədris ilində yüksək nəticə göstərən və təhsil sahəsində səmərəli fəaliyyətinə görə fərqlənən bir qrup təhsil işçisinə RİH başçısının qiymətli hədiyyələri və fəxri fərmanları təqdim edilib.