Penitensiar Xidmət qəhrəmanları yad edib - FOTO

Sovet imperiyasının Azərbaycan xalqına qarşı həyata keçirdiyi qanlı 20 Yanvar qırğınının 21-ci ildönümü ilə bağlı Ədliyyə Nazirliyinin Penitensiar Xidmətinin Baş İdarəsində ümumi yığıncaq keçirilib, keçirilmiş, Vətənimizin azadlığı və müstəqilliyi naminə canlarını fəda etmiş soydaşlarımızın əziz xatirəsi ehtiramla yad olunub.

Penitensiar Xidmətin İctimaiyyətlə əlaqələr şöbəsindən Lent.az-a verilən məlumata görə, Azərbaycan xalqının müstəqillik, demokratiya və azadlıq uğrunda mübarizə tarixinə sınaq anları kimi əbədi daxil olmuş 20 Yanvar faciəsi təkcə itkilər, nisgillər və yaralarla deyil, xalqimızın qan yaddaşına qəhrəmanlıq səhifəsi kimi həkk olunub.

1990-cı il yanvarın 19-dan 20-nə keçən gecə şahidi olduqları dəhşətli səhnələri, Azərbaycanın o zamankı səbatsız, səriştəsiz rəhbərliyinin günahı ucbatından uzun müddət faciəyə siyasi-hüquqi qiymət verilməməsini, hadisəyə ilk olaraq Heydər Əliyevin Azərbaycanın Moskvadakı daimi nümayəndəliyində öz kəskin etirazını bildirməsini xatırladıblar. Heydər Əliyevin xalqın təkidi ilə yenidən hakimiyyətə qayıdışından sonra 1994-cü ildə 20 Yanvar hadisələrinə ilk dəfə siyasi qiymət verilib, hadisənin günahkarlarının adları açıqlanıb, 20 Yanvar qurbanlarının xatirəsi əbədiləşdirilmiş, şəhid ailələrinə və o müdhiş gecədə sağlamlığını itirmiş soydaşlarımıza dövlət qayğısı göstərilib.

Tədbirin sonunda Penitensiar Xidmətin muzeyində “20 Yanvar” faciəsinə həsr edilmiş sənədli filmə baxış keçirilib.