İlham Əliyev Füzuli rayonuna gedib - FOTO  - YENİLƏNİB
27 sentyabr 2022 14:06 (UTC +04:00)

İlham Əliyev Füzuli rayonuna gedib - FOTO - YENİLƏNİB

Sentyabrın 27-də Azərbaycan Respublikasının Prezidenti İlham Əliyev və birinci xanım Mehriban Əliyeva Füzuli rayonuna səfər ediblər.

Lent.az xəbər verir ki, dövlət başçısı və birinci xanım Füzuli rayonunun Qaraxanbəyli kəndində 27 Sentyabr – Anım Gününə həsr olunmuş xatirə lövhəsinin önünə gül dəstələri qoyublar. 

Azərbaycan Prezidenti burada çıxış edib.

Prezident İlham Əliyevin çıxışı

- Bu gün Azərbaycanda Anım Günüdür. Bütün Azərbaycan xalqı şəhidlərimizin əziz xatirəsini yad edir. Allah bütün şəhidlərimizə rəhmət etsin. Şəhidlərimiz Vətən, torpaq uğrunda öz canlarını fəda etdilər. Biz öz şəhidlərimizlə fəxr edirik. Qəhrəman əsgər və zabitlərimizlə fəxr edirik. Şəhidlərimizin qanı yerdə qalmadı, biz şəhidlərimizin qanını aldıq. Döyüş meydanında qisasımızı aldıq. Doğma torpaqlarımızı düşməndən azad etdik, ölkəmizin ərazi bütövlüyünü bərpa etdik.

44 günlük Vətən müharibəsi şanlı tariximizdir. Azərbaycan xalqı bütün gücünü səfərbər edib, yumruq kimi birləşərək düşməni doğma torpaqlarımızdan qovdu. Bütün Azərbaycan xalqı birlik, iradə göstərmişdir. Qəhrəman əsgər və zabitlərimizin fədakarlığı, qəhrəmanlığı sayəsində bu gün biz azad edilmiş torpaqlarda qurub yaradırıq, şəhərlərimizi, kəndlərimizi bərpa edirik və həm də şanlı Zəfərimizlə fəxr edirik. Eyni zamanda, fəxr edirik ki, biz - bu torpaqların sahibləri bu torpaqlara yenidən həyatı qaytarırıq.

Şəhidlərimizin şərəfinə bu abidə - bu qaya parçası burada, Qaraxanbəyli kəndinin yaxınlığında ucaldılıb. Qaraxanbəyli kəndi və digər beş kənd İkinci Qarabağ müharibəsinin ilk günündə azad edilmişdir. Qaraxanbəyli, Qərvənd, kənd Horadiz, Yuxarı Əbdürrəhmanlı - Füzuli rayonunun kəndləri və Cəbrayıl rayonunun kəndləri - Böyük Mərcanlı və Nüzgar kəndi müharibənin ilk günündə azad edilmişdir. İlk şəhidləri biz məhz burada, bu yerdə vermişik. Bu abidənin yanında düşmənin səngəri yerləşirdi. Bu istiqamətdə beş-altı müdafiə xətti mövcud idi. Azərbaycan əsgəri, Azərbaycan zabiti bu müdafiə xəttini və bundan sonrakı müdafiə xətlərini yarmaq üçün ölümə gedirdi. Sözün əsl mənasında ölümə gedirdi, öz canını fəda edirdi ki, üçrəngli Bayrağımız Şuşada və o vaxt işğal altında olan digər bütün torpaqlarda dalğalansın. Öz canını fəda edirdi ki, Azərbaycan xalqı ləyaqətini bərpa etsin, ədaləti bərpa etsin və xalqımız öz torpaqlarına qayıtsın.

Bu istiqamətdən düşmənin birinci müdafiə xəttini yararaq bizim Zəfər yürüşümüz başlamışdır. 44 gün ərzində Azərbaycan Ordusu hər gün irəliyə gedirdi. Dayanmadan, durmadan, usanmadan hər gün qan tökərək, şəhidlər verərək irəliyə gedirdi, Zəfərə doğru gedirdi. Bir gün belə dayanmadı, bir gün belə geriyə addım atmadı, ancaq irəli getdi, düşməni qova-qova döyüş meydanında tarixi Zəfər çaldı. 44 gün ərzində 300-ə yaxın şəhər və kənd düşməndən azad edilmişdir. Düşmən məcbur olub kapitulyasiya aktını imzalayaraq məğlubiyyətini qəbul etdi və o vaxt hələ işğal altında olan torpaqlardan çıxmağa məcbur olmuşdur.

Biz xoşbəxt nəsilik ki, bu şərəfli missiya bizim üzərimizə düşüb. Xoşbəxt nəsilik ki, biz bu tarixi hadisənin həm şahidləriyik, həm də iştirakçılarıyıq. Bizdən sonra gələn nəsillər həmişə bu şanlı tarixlə fəxr edəcəklər. Biz fəxr edirik ki, bu torpağın övladlarıyıq. Fəxr edirik ki, döyüş meydanında öz haqqımızı bərpa etdik, düşməni məğlub etdik və bundan sonra biz müzəffər xalq kimi, qalib ölkə kimi əbədi yaşayacağıq.

Bu gün şəhidlərimizin əziz xatirəsini yad edərək, bir daha hər birimiz özünə söz verməlidir, vəd verməlidir, and içməlidir ki, biz müstəqilliyimizin keşiyində əbədi duracağıq, biz ərazi bütövlüyümüzün keşiyində əbədi duracağıq. Qoymayacağıq ki, bir daha düşmən başını qaldırsın, qoymayacağıq ki, bir daha bizim üçün təhdid yaratsın. Əgər bunu görsək, dərhal hərəkətə keçəcəyik. Əminəm ki, buna ehtiyac olmayacaq. Çünki ölkəmizin artan gücü, o cümlədən hərbi gücü müstəqilliyimizin, rahat həyatımızın təminatçısıdır, onun qarantıdır.

Bir daha şəhidlərimizə rəhmət diləyərək qeyd etməliyəm, bildirməliyəm ki, onların əziz xatirəsi Azərbaycan xalqının qəlbində əbədi yaşayacaqdır.

***

Prezident İlham Əliyev bu gün Füzuli rayonuna səfər edib.

Lent.az xəbər verir ki, bu barədə Birinci vitse-prezident Mehriban Əliyeva "İnstagram"da paylaşım edib.

Paylaşımda deyilir: "Anım Günü. Füzuli rayonu. 27.09.2022" 

***

Füzulidə Vətən müharibəsinin ilk şəhidlərinin xatirəsinə abidə ucaldılıb.

Lent.az xəbər verir ki, Prezident İlham Əliyev abidəni ziyarət edib, önünə gül dəstələri qoyub. 

Abidən üzərində yazılıb: “Vətən uğrunda canından keçən qəhrəmanların şəhid olduğu ilk yerlərdən biri”.

***

Prezident İlham Əliyev və birinci xanım Mehriban Əliyeva Füzuli rayonunun Qaraxanbəyli kəndində 27 sentyabr – Anım Gününə həsr olunmuş xatirə lövhəsini ziyarət ediblər.

Dövlət başçısı və birinci xanım xatirə lövhəsinin önünə gül dəstələri qoyublar.

# 2862
avatar

Oxşar yazılar

Mehriban Əliyeva Şəkidən paylaşım edib

Mehriban Əliyeva Şəkidən paylaşım edib

2 dekabr 2022 , 18:42
İlham Əliyev və Mehriban Əliyeva Şəki rayonuna gediblər

İlham Əliyev və Mehriban Əliyeva Şəki rayonuna gediblər

2 dekabr 2022 , 13:34
Artıq bu şəxslərə dosent və professor adı verilməyəcək - FƏRMAN

Artıq bu şəxslərə dosent və professor adı verilməyəcək - FƏRMAN

26 noyabr 2022 , 17:37
Prezidentdən İsraildəki səfirliklə bağlı SƏRƏNCAM

Prezidentdən İsraildəki səfirliklə bağlı SƏRƏNCAM

26 noyabr 2022 , 16:18
Prezidentin oğlu Heydər Əliyev ailə həyatı qurdu - FOTO

Prezidentin oğlu Heydər Əliyev ailə həyatı qurdu - FOTO

26 noyabr 2022 , 13:31
Prezidentdən Madər Musayevlə bağlı  SƏRƏNCAM

Prezidentdən Madər Musayevlə bağlı SƏRƏNCAM

25 noyabr 2022 , 15:25
İlham Əliyev özünə yeni köməkçi təyin etdi

İlham Əliyev özünə yeni köməkçi təyin etdi

24 noyabr 2022 , 17:50
İlham Əliyev Serbiyaya gedib

İlham Əliyev Serbiyaya gedib

23 noyabr 2022 , 13:28