Qış aylarının sevimli yeməyi “Ətli piroq”: Onu hazırlamaq üçün...

Yumşaq qat-qat xəmirdən müxtəlif cürə yeməklər hazırlaya bilərsiniz. Belə yeməklər qış aylarının ən sevimlisi olur. Lent.az bu gün sizə “ətli piroq”un hazırlanma qaydasını təqdim edəcək. Qat-qat xəmir ilə göbələkli, farş ətli piroqun dadı uzun müddət damağınızdan getməyəcək.

Qeyd edək ki, qat-qat xəmir mağazalarda hazır satılır. İstəsəniz, evdə də hazırlaya bilərsiniz.

“Ətli piroq”u hazırlamaq üçün lazım olan ərzaqlar:

400 qr qat-qat xəmir

250 qr şampinyon göbələyi

150-200 qr farş ət

1 ədəd soğan

50 qr holland pendiri

3 x/q duru yağ

İstiot

Duz

İndi isə hazırlanma qaydasına baxaq. Əvvəlcə göbələyi təmiz yuyun. Xırda-xırda doğrayın. Tavaya duru yağı və doğranmış göbələkləri əlavə edib 5-7 dəqiqə bişirin. Daha sonra soğanı təmizləyin, xırda-xırda doğrayın və göbələyin üzərinə əlavə edib 10-15 dəqiqə zəif temperaturda bişirin. Ayrı bir tavaya duru yağı əlavə edib farş əti bişirin. Farş ət tam bişənə qədər nəzarət edin. Bişənə yaxın duzu, istiotu əlavə edin.

Qat-qat xəmiri sobanın qabına sərin. Xəmiri sobanın qabına yerləşdirməmişdən əvvəl qabın dibinə un səpin. Xəmirin bir hissəsinə hazır olan farşı və göbələyi əlavə edin. Çünki digər yarısı ilə onun üstünü örtəcəksiniz. Holland pendirini sürtgəcdən keçirib üzərinə əlavə edin. Hazır olan piroqu sobaya qoyub 200 dərəcədə təxminən 30 dəqiqə bişirin. “Ətli piroq” hazırdır.

Nuş olsun!