“Eurovision 2025” qalmaqal mərkəzində: İrlandiya müsabiqəyə rus qadının yazdığı mahnı göndərdi

Mahnı İrlandiyanın milli münsiflər heyəti və tamaşaçılarından maksimum 12 bal alıb.

Lent.az xarici mediaya istinadla xəbər verir ki, hər il "Eurovision" mahnı yarıçması böyük müzakirələrlə yadda qalır. 2025-ci il də bunlardan geri qalmayıb.

Rəsmi müsabiqə başlamazdan əvvəl İrlandiyanın seçimi tənqid dalğasına səbəb olub. Ölkəni Basel səhnəsində "Laika Party" mahnısı ilə EMMY (Emmi Kristin Guttulsrud Kristiansen) təmsil edəcək. Mahnının həmmüəlliflərindən birinin isə rusiyalı Larisa Vildanova (Tormi) olması narazılıq yaradıb.

İrlandiya milli münsiflər heyəti və tamaşaçılar tərəfindən maksimum 12 bal alan bu mahnı kosmosa göndərilən ilk heyvan - sovet iti Layka haqqındadır. Lakin mahnının əsasında duran tarix bayram əhval-ruhiyyəsindən uzaqdır: Layka 1957-ci ildə "Sputnik-2"nin buraxılmasından cəmi yeddi saat sonra istidən ölüb.

Mahnının həmmüəllifi Larisa Torminin adı isə xüsusi mübahisələrə səbəb olub. O, Rusiyada doğulsa da, artıq 20 ildən çoxdur ki, İrlandiyada yaşayır. Tormi siyasətə qarışmadığını və müharibəni dəstəkləmədiyini iddia etsə də, onun bəzi açıqlamaları mübahisəli səslənir. O, "rusların da əziyyət çəkdiyini və sadə insanların heç nədə günahkar olmadığını" bildirərək, faktiki olaraq Kremlin narrativlərini yayıb.

Mahnı və onun müəllifləri ilə bağlı xəbər artıq beynəlxalq müzakirələrə səbəb olub. Bəzi ukraynalılar və Avropa tamaşaçıları İrlandiyanın bu seçimini mövcud vəziyyətdə yersiz hesab edirlər. Eurovision təşkilatçıları isə hələlik rəsmi açıqlama verməkdən çəkinirlər. Ziferblat "Eurovision-2025"dəki çıxışlarında nəyi dəyişəcəklərini açıqlayıb.