“Sahə” filmi Beynəlxalq Barbakan Festivalında

Film bu dəfə Beynəlxalq Barbakan Festivalında (Barbakan Festival in Banska Bystrica ) iştirak edəcək. Festival noyabrın 2-dən 6-a qədər Slovakiyanın Bansk Bıstrisa şəhərində baş tutacaq.

Lent.az-ın məlumatına görə, “OZ Vresk Factory” tərəfindən yaradılmış Barbakan kinofestivalı Avropa və dünya audiovizual məhsullarının keyfiyyətinin yoxlanılması üzrə qeyri-kommersiya ekspertidir. Festival özündə üç əsas mədəni elementi əks etdirir: film, mahnı və təsviri incəsənət.

Xatırladaq ki, “Sahə” bədii filmində tanınmış fotoqrafın uşaqlıq illərinə mistik səyahətindən söhbət açılır. Bədii film “Nərimanfilm” (Azərbaycan), “Qruziyafilm” və “Baqirafilms” (Gürcüstan) kinostudiyalarının birgə istehsalıdır. Filmdə baş rolları Zaza Bejaşvili (Gürcüstan), Merissa Papel (Fransa), Vaqif İbrahimoğlu (Azərbaycan) və Timur Oduşev (Azərbaycan) ifa edib. Filmin ssenari müəllifi və rejissoru İlqar Safat, operatorlar Konstantin Esadze və Varlam Karçxadzedir.

Ötən il “Sahə” filmi Azərbaycandan “Xarici dildə ən yaxşı film” kateqoriyasında 83-cü “Oskar” mükafatına təqdim edilib.

Xəyalə