“Mozalan” kino-jurnalı üçün ssenari müsabiqəsi yekunlaşdı

Mədəniyyət və Turizm Nazirliyinin elan etdiyi “Mozalan” kino-jurnalı üçün ssenari müsabiqəsi başa çatıb. Nazirliyin mətbuat katibi Zöhrə Əliyevanın Lent.az-a verdiyi məlumata görə, “Mozalan”a ictimai diqqəti artırmaq, onun süjetlərini müasir həyatın tələblərinə cavab verən mövzularla zənginləşdirmək və kino-dramaturgiyanın bu növünə yeni qüvvələr cəlb etmək məqsədi ilə keçirilən müsabiqəyə professional kino-dramaturqların və digər müəlliflərin müasir həyatımızın problemlərini əks etdirən, 2-4 dəqiqəlik bədii süjet üçün nəzərdə tutulan ssenarilər təqdim olunub. Müsabiqəsinin münsiflər heyətinin qərarına əsasən “Mozalan” kinojurnalı üçün ssenari müsabiqəsinin üç qalib ssenarisi müəyyənləşib. “Ağıllı” və ya “Nağdsız haqq-hesab” (müəllif: Məlikov Rüfət) birinci, “Lift” (müəllif: Elçin Musaoğlu) ikinci, “Heyvanlar aləminə səyahət” (müəllif: Lalə Abbasova) üçüncü yerə layiq görülüb.

Münsiflər heyətinin müəyyən etdiyi qalib ssenarilər “Mozalan” studiyasında çəkiləcək və onların müəlliflərinə qonorar veriləcək.
Xəyalə