Romada Heydər Əliyevin anadan olmasının 88-ci ildönümümə həsr edilmiş konsert keçirilib

Səfirlikdən Lent.az-a verilən məlumata görə, konsertdə Azərbaycanın əməkdar artisti, Dövlət Akademik Opera və Balet Teatrının solisti Fidan Hacıyeva azərbaycanlı pianoçu Zülfiyyə Sadıqova və italyan pianoçu Paolo Saraçinonun müşayiəti ilə Azərbaycan və italyan opera musiqisindən əsərlər ifa edib.

Konserti giriş sözü ilə açan Azərbaycanın İtaliyadakı səfiri Vaqif Sadıqov Heydər Əliyevin həyat və fəaliyyətindən söhbət açıb. Onun bu il müstəqilliyinin bərpasının 20 illiyini qeyd edən müasir Azərbaycanın qurucusu olduğunu qeyd edərək, bu gün ölkəmizin Cənubi Qafqazda lider ölkəyə çevrildiyini vurğulayıb.

Daha sonra İtaliyanın musiqişünası və tanınmış opera ifaçısı xanım Bruna Balioni Azərbaycanın musiqi mədəniyyətindən və konsertin proqramından danışıb.

Konsertdə İtaliyanın çoxsaylı mədəniyyət və incəsənət xadimləri, dövlət qurumlarının, diplomatik korpusun və kütləvi informasiya vasitələrinin nümayəndələri iştirak edib. Konsertdə səslənmiş musiqi proqramı qonaqların böyük marağına səbəb olub.