Elçinin “Teleskop” tragikomediyası səhnələşdirilir

Teatrın mətbuat katibi Elçin Cəfərovun Lent.az-a verdiyi məlumata görə, tamaşanın quruluşçu rejissoru Finlandiyada yaşayan azərbaycanlı Kamran Şahmərdandır. Tamaşaya tərtibat vermək üçün məşhur səhnə tərtibatçısı Eduard Koçerqin Milli Dram Teatrına dəvət olunub. Tamaşanın geyim üzrə rəssamı Eduard Koçerqinin həyat yoldaşı Anna Koçerqinadır. 11 şəkildən və 2 epiloqdan ibarət tragikomediyanın musiqi tərtibatı Həmid Kazımzadəyə məxsusdur, rejissor assistenti Xanım Həsənovadır.

Qeyd edək ki, hazırda Finlandiyada yaşayan Kamran Şahmərdan uşaq yaşlarında rejissor Gülbəniz Əzimzadənin “Qaladan tapılan mücrü” filmində baş rol ifa edib. Orta təhsilini Bakıda alan Kamran Şahmərdan Stokholm İncəsənət Akademiyasını bitirib. UNİMA Beynəlxalq Kukla Teatrları Assosiasiyasının üzvüdür. 1999-cu ildən Finlandiyada yaşayır. Rusiyanın xalq rəssamı, Rusiya İncəsənət Akademiyasının həqiqi üzvü, Dövlət mükafatları laureatı olan Eduard Koçerqin Rusiyada, Finlandiya, Yuqoslaviya, Polşa, Macarıstan, Fransa, Almaniya, ABŞ, Kanada və Yaponiyanın müxtəlif teatrlarında 200-ə yaxın tamaşaya tərtibat verib.