Azərbaycan və Rusiya fotoqraflarının birgə sərgisi açılıb

Muzey Mərkəzində Mədəniyyət və Turizm Nazirliyinin təşkilatçılığı ilə "İpək yolu dostluğu" və "Uzun sürən müharibənin əks-sədası" adlı fotosərgilərin açılışı olub. Nazirliyin mətbuat xidmətindən Lent.az-a verilən məlumata görə, tədbir Azərbaycanın hökuməti və Rusiya Federasiyasının Çelyabinsk vilayəti hökuməti arasında ticarət-iqtisadi, elmi-texniki və mədəni əməkdaşlıq haqqında" sazişlə təsdiq olunan 2012-2017-ci illər üzrə Tədbirlər Planına uyğun olaraq təşkil edilib.

Sərgidə Çelyabinskdən olan fotoqraf-rəssam Vladimir Boqdanovskinin Azərbaycana səfəri zamanı lentə aldığı fotolar ("İpək yolu dostluğu") və Azərbaycan Fotoqraflar Birliyi üzvlərinin Qarabağa həsr olunan foto əsərləri ("Uzun sürən müharibənin əks-sədası") yer alıb.

Qeyd edək ki, Azərbaycan fotoqraflarının "Uzun sürən müharibənin əks-sədası" sərgisi Ermənistanın ölkəmizə hərbi təcavüzünün ağır nəticələrinə, Dağlıq Qarabağ müharibəsinin fəsadlarına həsr olunub. Ekspozisiyada 9 azərbaycanlı fotoqrafın ağ-qara fonda fotoları sərgilənir. "İpək yolu dostluğu. Yeddi gün Azərbaycanda" fotosərgisi Çelyabinsk Dövlət Diyarşünaslıq Muzeyinin direktoru Vladimir Boqdanovskinin ölkəmizə yaradıcılıq ezamiyyətinin yekunu kimi təqdim olunur. Ekspozisiyada müxtəlif janrlarda fotoşəkillər yer alıb. Burada Qafqazın mənzərələrini, yerli sakinlərin portretlərini, qədim və müasir arxitekturanı, müxtəlif regionların nadir təbiətini görmək mümkündür.
Sərgi noyabrın 16-dək davam edəcək.