Müstəqilliyimizin mübariz şairi – FOTO

XX əsr Azərbaycan poeziyasının tanınmış nümayəndəsi, xalq şairi, filologiya elmləri doktoru, professor Xəlil Rza Ulutürkün anadan olmasının 80 illik yubileyinə həsr olunan "Milli müstəqilliyimizin mübariz şairi" mövzusunda dəyirmi masa keçirilib. Lent.az-ın məlumatına görə, prezident İlham Əliyevin “Xəlil Rza Ulutürkün 80 illik yubileyinin keçirilməsi haqqında" 2012-ci il 4 iyun tarixli sərəncamının tələblərinə uyğun olaraq keçirilən tədbirdə şairin ailə üzvləri, qohumları, dostları, millət vəkilləri, elm və mədəniyyət xadimləri, ədəbiyyatşünaslar, teatrşünaslar, ədəbi tənqidçilər, yazıçılar, muzey direktorları, bəstəkarlar və kütləvi informasiya vasitələrinin nümayəndələri iştirak ediblər.

Tədbirdə çıxış edənlər şairin yaradıcılığından, xüsusən vətənpərvərlik ruhunda qələmə aldığı əsərlərdən danışaraq, onun milli, bəşəri dəyərlərimizin və doğma dilimizin yad sözlərdən qorunub saxlanılması istiqamətindəki xidmətlərindən danışıblar. Çıxışçılar şairin ana dili uğurunda mübarizəsini təkrarolunmaz hesab ediblər.

Şairlə bağlı xatirələrini danışan natiqlər onun görkəmli şair olmaqla bərabər, əsl insani xüsusiyyətlərindən söhbət açıblar.

Görüşün sonunda Xəlil Rza Ulutürkün ömür-gün dostu Firəngiz xanım Ulutürk çıxış edərək Xəlil Rza Ulutürk haqqında xatirələrini danışıb. Həyat yoldaşının keşməkeşli, çətin ömür yolundan danışan Firəngiz Ulutürk Xəlil Rzanın yaradıcılığına göstərilən diqqətə görə tədbir iştirakçılarına minnətdarlığını bildirib.

Dəyirmi masa müzakirələrə davam edib.

Jalə