Ben Afflek və Cennifer Lopez mülklərini bölüşdürə bilmirlər - QALMAQAL

Boşandıqdan sonra ulduzlar evlərini satmağa çalışırlar, lakin razılığa gələ bilmirlər – aktyor sövdələşməni tezliklə yekunlaşdırmaq istəyir, müğənni isə yüksək qiymətə israr edir.

Lent.az xarici mediaya istinadən xəbər verir ki, Ben Afflek və Cennifer Lopez arasında yenidən gərginlik yaranıb. Təxminən bir il əvvəl boşanan keçmiş ər-arvad evlilikləri dövründə aldıqları birgə evə görə ortaq məxrəcə gələ bilmirlər.

Xəyallarındakı malikanə satışa çıxarılıb, lakin alqı-satqı prosesi hələ də irəliləmir. Əsas səbəb – keçmiş cütlüyün fərqli mövqeləridir. Lopez evin ilkin qiymətinin saxlanılmasında israrlıdır, çünki daha yüksək məbləğ əldə edə biləcəyinə inanır. Amma Afflek bu məsələni bir an əvvəl bağlamaq istəyir və keçmişlə bağlarını qoparmaq üçün qiyməti endirməyə hazırdır.

“Məqsədi evdən qurtulmaqdır, çünki artıq boşanıblar və o, bütün əlaqələri kəsmək, bu məsələni bağlamaq istəyir. O sadəcə evi satmaq istəyir. Hətta qiyməti endirmək də istəyir”, – mənbə bildirir.

Bundan əvvəl isə xəbərlər yayılmışdı ki, Cennifer Lopez keçmiş əri Ben Afflekdən aldığı dəyərli nişan üzüyü ilə vidalaşmaq fikrində deyil.