“SOY” kompaniyasından növbəti yenilik

Bu barədə Lent.az-a “SOY” prodakşnın direktoru Oqtay Əliyev məlumat verib. Onun sözlərinə görə, yaxın vaxtlarda serial çəkilişləri başlayacaq: “Serial çəkilişinə hazırlaşırıq. Növbəti aydan sözügedən seriala hazırlıq işləri başlayacaq. Çox maraqlı və baxımlı olmağına çalışırıq. Bilirsiniz, hazırda ən keyfiyyətli və baxımlı türk serialları sayılır. Ən azı bu standartlara yaxınlaşan bir iş ərsəyə gətirmək niyyətimiz var”.

Oqtay Əliyev sözügedən serial üçün hazırda komanda şəklində çalışdıqlarını deyib: “Filmin ssenari müəllifləri qrup şəklində çalışır. Konkret mövzu və ideya var, film ailə-məişət mövzusunda olacaq. Təəssüf ki, bizdə çoxseriyalı film çəkilişinin konkret sistemi və sxemi yoxdur, bütün bunlar bir yana, aktyorları çəkiliş meydanına cəlb etmək çətindir. Hərəsi konkret dövlət idarəsində çalışır. Bir neçə işi sistemli şəkildə görmək mümkün deyil. Onları da qınamaq olmur, deyə bilmərik ki, bir neçə aylıq çəkilişdən ötrü ərizəni yaz və teatrdan çıx. Artıq aktyor seçimi etmişik, təbii ki, fikir mübadiləsi aparılacaq və müəyyən dəyişikliklər də olacaq”.

Lalə Yusifqızı