Azəri Günel: “Adımın əvvəlində Azəri kəlməsini qururla daşıdım” - EKSKLÜZİV

“Səhnəyə gəldiyi gündən “Azəri qızı” kəlməsini adının önündə gəzdirən insan birdən-birə bundan necə imtina edə bilər?”

Türkiyədə yaşayan azərbaycanli müğənni Günel özü barəsində Azərbaycan mətbuatında yer alan bir məlumata münasibət bildirib. Həmin məlumatda “Azəri qızı” müraciətinə cavab olaraq, Günelin guya “Azeri kızı küçüklüyümdə kaldı, ben artıq Günelim” söylədiyi yazılıb. Müğənni Lent.az-a açıqlamasında bununla bağlı deyib: “Mənim son - “Adi yok” diskimi alanlar “Azəri Günel” sözünü artıq görüblər. Bunu mənə İbrahim Tatlısəs tövsiyə edib. Azəri qızı uşaqlıqdan bəri adımın önündə olduğu üçün kiçik qızcığaz imicindən qopub, Azəri Günel adı ilə diskin üzərində göründüm”.

Günel Azəri adından imtina etdiyi xəbərləri qətiyyətlə təkzib edib: “Səhnəyə gəldiyi gündən “Azəri qızı” kəlməsini adının önündə gəzdirən insan birdən-birə bundan necə imtina edə bilər? Həmişə vətənimlə, onun incəsənəti ilə fəxr etdim. Adımın əvvəlində Azəri kəlməsini qururla daşıdım”.

Lalə Yusifqızı