Azərbaycanlı müğənnilərin Haaqadakı konsertində bomba həyəcanı

Almaz Ələsgərli, Qismət və Mehrim konsertdən öncə böyük stress keçiriblər
Əməkdar artist Almaz Ələsgərli və gənc müğənnilər Qismət və Mehrimin martın 22-də Hollandiyanın Haaqa şəhərində verdikləri konsert zamanı insident baş verib.
Lent.az-ın məlumatına görə, konsertin təşkilatçısı, yerli şou-biznes aləmində Avropa prodüseri kimi tanıdığımız, "Sultan production"un rəhbəri Sultan Mustafayev ANSPRESS-ə bildirib ki, müğənnilər Hollandiyada çox ciddi problemlərlə qarşılaşıblar. Belə ki, konsert başlamazdan 2-3 saat əvvəl, çox sayda polis zala daxil olaraq, axtarışa başlayıb. Təşkilatçı nə baş verdiyi ilə maraqlananda, polis zala bomba qoyulması barədə məlumat daxil olduğunu bildirib.
Təhlükəsizliyə tam əmin olunduqdan sonra tamaşaçılar zala buraxılıblar. Konsert isə təyin olunmuş vaxtdan 2 saat 15 dəqiqə gec başlayıb. Təşkilatçının sözlərinə görə, zalda bombanın aşkarlanıb-aşkarlanmadığı onlardan gizli saxlanılıb. Baş verən hadisə tamaşaçılardan gizlədilsə də, sənətçilərimiz əməlli-başlı stress keçiriblər.
Qeyd edək ki, müğənnilər martın 21-də Belçikanın Brüssel şəhərində də konsert proqramı ilə çıxış ediblər.